admin
Mana Enadu : వివాహాది శుభకార్యాలు చేయాలంటే కార్తీక మాసం, మాఘమాసం, శ్రావణ మాసాలకు మాత్రమే ఎక్కువ ప్రాధాన్యమిస్తారు. కానీ ధనుర్మాసం కూడా చాలా ఆధ్యాత్మిక ప్రయోజనాలు కలిగిన నెల. ఈ నెలకు చాలా ప్రత్యేకత ఉంది. సూర్యుడు ఈ నెల 15వ తేదీన ధనస్సు రాశిలోకి ప్రవేశించాడు. 2025 జనవరి 14వ తేదీ వరకు ధనుస్సు రాశిలోనే సంచారం చేస్తాడు. మరి ఈ మాసంలో శుభకార్యాలు చేయవచ్చా? అనేది ఈ స్టోరీలో తెలుసుకుందాం.
ధనుర్మాసం అంటే?
డిసెంబర్ 15వ తేదీన ఆదివారం సూర్యుడు ధనుస్సు రాశిలోకి ప్రవేశించాడు. డిసెంబర్ 16వ తేదీ నుంచి ధనుర్మాసం మొదలైంది. ఈ మాసం విష్ణు పూజకు చాలా ప్రత్యేకమైనది. తిరుమలలో ధనుర్మాసం నెలరోజులు సుప్రభాతం బదులు తిరుప్పావై గానం చేస్తారనే విషయం తెలిసిందే. విష్ణు ఆలయాల్లో ఉదయం అర్చనలు చేసి నివేదనలు చేసి వాటిని పిల్లలకు పంచుతారు. ధనుర్మాసంలో స్నాన, దాన, హోమ, వ్రత పూజలు చేయడం చాలా శుభకరమని పండితులు చెబుతుంటారు. ఈ మాసంలో ఉదయం, సాయంత్రం దీపారాధన చేయడం వల్ల లక్ష్మీదేవి అనుగ్రహంతో దరిద్రం దూరమవుతుందని చాలా మంది విశ్వాసం.
ఇలా పూజ చేస్తే మంచి భర్త దొరుకుతారు
ఇక ఈ మాసంలో వివాహం కావాల్సిన అమ్మాయిలు ప్రతి రోజు సూర్యోదయానికి ముందే స్నానాలు చేసి పంచామృతాలతో మహా విష్ణువును అభిషేకించాలని పండితులు చెబుతున్నారు. ఆ తర్వాత తులసీ దళాలు, పూలతో స్వామిని పూజించాలని తెలిపారు. ఈ సమయంలో అష్టోత్తర సహస్రనామాలు పఠిస్తే శుభం కలుగుతుందని అంటున్నారు. పూజ అనంతరం స్వామికి నైవేద్యం సమర్పించాలని.. నెలరోజులూ చేయలేని వారు 15 రోజులు లేదా ఒక్క రోజైనా చేసినా.. కోరుకున్న వ్యక్తితో పెళ్లి జరుగుతుందని నమ్మకం.
శుభకార్యాలు చేయొచ్చా?
ఏడాది పొడవునా వివిధ రకాల పూజలతో భగవంతుని కోసం సమయం కేటాయించలేని వారి కోసమే ఈ ధనుర్మాసం. అందుకే ఈ మాసంలో ఎలాంటి శుభకార్యాలు చేయరు. ధనుస్సు, మీనంలో రవి ఉన్నప్పుడు, సూర్యుని రాశి అయిన బృహస్పతిలో ఉన్నప్పుడు ఏ శుభకార్యాన్ని నిర్వహించకూడదని పండితులు చెబుతున్నారు.
Desk
swarna boddula
