adminతెలంగాణలో పెట్టుబడి పెట్టేందుకు ఇప్పటికే సిద్ధమైన దిగ్గజ సంస్థ ఫాక్స్‌కాన్ మరో కీలక ప్రకటన చేసింది. గతంలో ప్రకటించిన పెట్టుబడికి అదనంగా మరో 400 మిలియన్ డాలర్లు ఇన్వెస్ట్ చేస్తున్నట్లు తెలిపింది. ఈ విషయంపై తెలంగాణ మంత్రి కేటీఆర్ ట్వీట్ చేశారు.
తైవాన్‌కు చెందిన ప్రముఖ సంస్థ ఫాక్స్‌కాన్ కంపెనీ మన తెలంగాణలో పెట్టుబడులు పెడుతున్న విషయం తెలిసిందే. ఇప్పటే 150 మిలియన్ డాలర్ల పెట్టుబడులకు ఒప్పందం కుదుర్చుకాగా.. తాజాగా మరో కీలక ప్రకటన చేసింది. గతంలో ప్రకటించిన దానికి అదనంగా మరో 400 మిలియన్ డాలర్లు అంటే భారత కరెన్సీలు రూ.3,318 కోట్లు పెట్టుబడులు పెట్టబోతున్నట్లు వెల్లడించింది. ఈ విషయాన్ని ఫాక్స్‌కాన్ భారత ప్రతినిధి వి లీ ట్వీట్టర్ పోస్ట్ ద్వారా వెల్లడించారు. గతంలో కుదుర్చుకున్న 150 మిలియన్ డాలర్ల ఒప్పందానికి ఇది అదనమని తెలిపారు. దీంతో ఫాక్స్‌కాన్ కంపెనీ తెలంగాణలో పెట్టుబడులు మొత్తం 550 మిలియన్ డాలర్లకు చేరుకున్నాయి.
తెలంగాణలో తమ పెట్టుబడులను పెంచుతున్నట్లు ఫాక్స్‌కాన్ తీసుకున్న నిర్ణయంపై మంత్రి కేటీఆర్ హర్షం వ్యక్తం చేశారు. ప్రపంచ ప్రముఖ సర్వీస్ ప్రొవైడర్ సంస్థ ఫాక్స్‌కాన్ తో తమకు ఉన్న దృఢమైన బంధానికి ఇది నిదర్శనమని కేటీఆర్ ట్వీట్ చేశారు. ఫాక్స్‌కాన్ సంస్థతో పరస్పర అవగాహన కొనసాగుతోందని పేర్కొన్నారు. తెలంగాణలో ఫాక్స్‌కాన్ ఇచ్చిన హామీని నిలబెట్టుకుంటోందన్నారు. తెలంగాణ అభివృద్ధి స్పీడుకు ఇది మరో నిదర్శనమని కేటీఆర్ పేర్కొన్నారు.
ఫాక్స్‌కాన్ ఇది వరకే తెలంగాణ ప్రభుత్వంతో ఒప్పందం కుదుర్చుకుంది. ఇందులో భాగంగా రంగారెడ్డి జిల్లా కొంగరకలాన్‌లో ఎలక్ట్రానిక్స్ మాన్యుఫాక్చరింగ్ ప్లాంట్ ఏర్పాటుకు ఈ ఏడాది మే, 2023లో మంత్రి కేటీఆర్ శంకుస్థాపన చేసిన విషయం తెలిసిందే. ఈ యూనిట్‌లో ఫాక్స్‌కాన్ రూ. 1,656 కోట్ల పెట్టుబడులు పెట్టనుందని సమాచారం. ఈ ప్లాంట్ ఫాక్స్‌కాన్ ఇంటర్ కనెక్ట్ టెక్నాలజీ ఆపరేషన్స్ విషయంలో తెలంగాణలోని ఆపరేషన్స్ కు కేంద్రంగా పని చేయడంతో పాటు సంస్థ తమ ఉత్పత్తి సామర్థ్యాన్ని విస్తరించడానికి వీలు కల్పిస్తుందని ఫాక్స్‌కాన్ పేర్కొంది.
మరోవైపు.. ఫాక్స్ కాన్ తెలంగాణలో పెట్టుబడి పెట్టడం ద్వారా ప్రత్యంగా 25 వేల మందికి నేరుగా ఉద్యోగ అవకాశాలు లభిస్తాయని మంత్రి కేటీఆర్ గతంలో వెల్లడించారు. ఫాక్స్ కాన్ ప్లాంట్ కోసం తెలంగాణ ప్రభుత్వం రంగారెడ్డి జిల్లా కొంగరకలాన్ లో 196 ఎకరాల భూమిని కేటాయించింది. ఈ పరిశ్రమ ఏర్పాటు ద్వారా పరోక్షంగా మరో 35 వేల మందికి ఉద్యోగ, ఉపాధి అవకాశాలు లభించనున్నాయని తెలంగాణ ప్రభుత్వం చెబుతోంది. ఫాక్స్ కాన్‌తో ఒప్పందం కుదిరిన రెండున్నర నెలల్లోనే శంకుస్థాపన చేయడం గమనార్హం. పనులు పూర్తి చేసుకుని త్వరలోనే ఉత్పత్తి ప్రారంభిస్తామని ఫాక్స్ కాన్ సంస్థ సైతం ప్రకటిస్తోంది.
Desk
