ప్రశాంతంగా కొనసాగుతున్న జేఈఈ మెయిన్‌ ఎగ్జామ్స్

దేశవ్యాప్తంగా జేఈఈ మెయిన్‌ (JEE Main) పరీక్షలు ప్రశాంతంగా కొనసాగుతున్నాయి. ఉదయం 9 గంటలకు ప్రారంభమైన ఎగ్జామ్ మధ్యాహ్నం 12 గంటల వరకు జరగనుంది. మళ్లీ మధ్యాహ్నం 3 నుంచి 6 గంటల వరకు పరీక్షలు నిర్వహిస్తున్నారు. తెలుగు రాష్ట్రాల్లో పెద్ద ఎత్తున విద్యార్థులు ఈ పరీక్షలకు హాజరయ్యారు. ముఖ్యంగా హైదరాబాద్‌, వరంగల్‌, విజయవాడ, విశాఖపట్నం, తిరుపతి తదితర ప్రాంతాల్లో ఏర్పాటు చేసిన పరీక్ష కేంద్రాల వద్ద విద్యార్థులు, వారి తల్లిదండ్రులతో కోలాహలం నెలకొంది.

హైదరాబాద్ లో ట్రాఫిక్ జామ్

మరోవైపు ఉదయాన్నే పరీక్ష కేంద్రాలకు విద్యార్థులు వారి తల్లిదండ్రులతో వెళ్లడంతో హైదరాబాద్‌లో పలు చోట్ల ట్రాఫిక్‌ జామ్‌ నెలకొంది. ముఖ్యంగా ఎల్‌బీనగర్‌ ప్రాంతంలో ట్రాఫిక్‌కు కాసేపు అంతరాయం కలగడంతో రంగంలోకి దిగిన ట్రాఫిక్ పోలీసులు రద్దీని క్లియర్ చేశారు. ఈనెల 22, 23, 24, 28, 29 తేదీల్లో ఎన్‌ఐటీల్లో బీటెక్‌ సీట్ల భర్తీకి పేపర్‌-1 నిర్వహించనున్నారు.

లక్షన్నర మంది హాజరు

జనవరి 30వ తేదీన బీఆర్క్, బీ ప్లానింగ్‌ సీట్ల కోసం పేపర్‌-2 జరుగుతుందని అధికారులు తెలిపారు. దేశవ్యాప్తంగా రెండు పేపర్లకు కలిపి 12 లక్షల మందికిపైగా దరఖాస్తు చేసినట్లు వెల్లడించారు. తెలుగు రాష్ట్రాల నుంచి సుమారు లక్షన్నర మంది హాజరవుతున్నట్లు అంచనా వేశారు. పరీక్షకు రెండు గంటల ముందే విద్యార్థులు కేంద్రాల వద్దకు చేరారు.