ముంబయిలో ‘కన్నప్ప’ హిందీ టీజర్ లాంఛ్

మంచు విష్ణు (Manchu Vishnu) డ్రీమ్ ప్రాజెక్టుగా తెరకెక్కిన లేటెస్ట్ సినిమా ‘కన్నప్ప (Kannappa)’. మోహన్ బాబు నిర్మాతగా వ్యవహరిస్తున్న ఈ చిత్రానికి మహాభారతం సీరియల్ ఫేం ముకేశ్ కుమార్ సింగ్ దర్శకత్వం వహిస్తున్నారు. ప్రభాస్, మోహన్ లాల్, అక్షయ్ కుమార్, శివరాజ్ కుమార్, కాజల్ అగర్వాల్, ప్రీతి ముకుందన్ వంటి స్టార్ నటులు కీలక పాత్రల్లో నటిస్తున్నారు. ఇప్పటికే వీరి పాత్రలకు సంబంధించిన పోస్టర్లు రిలీజ్ అయిన విషయం తెలిసిందే. ఇక ఈ సినిమాలోని శివ శివశంకరా అనే పాట యూట్యూబ్ లో బాగా పాపులర్ అయింది.

కన్నప్ప టీజర్ లాంఛ్

ఇక తాజాగా మేకర్స్ ముంబయిలో కన్నప్ప టీజర్ లాంఛ్ ఈవెంట్ (Kannappa Hindi Teaser Launch) నిర్వహించారు. ఈ వేడుకలో కన్నప్ప అఫీషియల్ టీజర్ ను ఆవిష్కరించారు. బాలీవుడ్ సూపర్ స్టార్ అక్షయ్ కుమార్ (Akshay Kumar), నటుడు, నిర్మాత విష్ణు మంచు, దర్శకుడు ముకేష్ కుమార్ సింగ్ పలువురు నటులు ఈ కార్యక్రమంలో సందడి చేశారు. సినిమా ఎగ్జిక్యూటివ్ ప్రొడ్యూసర్ శ్రీ వినయ్ మహేశ్వరి ఆధ్వర్యంలో నిర్వహించిన ఈ ఈవెంట్ గ్రాండ్ గా సక్సెస్ అయింది. ఈ వేడుకలో ప్రత్యేకంగా ప్రదర్శించిన కన్నప్ప హిందీ టీజర్ అందరినీ ఆకట్టుకుంది.

ఆ నమ్మకంతోనే ఒప్పుకున్నా

ముకేష్ కుమార్ సింగ్ (Mukesh Kumar Singh) దర్శకత్వంలో డా. మోహన్ బాబు (Mohan Babu) నిర్మించిన ఈ చిత్రం విజువల్ వండర్‌గా ఆడియెన్స్ ముందుకు రాబోతోంది. శివుడి పాత్రలో నటించిన అక్షయ్ కుమార్ ఈ కార్యక్రమంలో మాట్లాడుతూ.. ‘మొదటగా కన్నప్ప ఆఫర్ నా వద్దకు వచ్చినప్పుడు రెండు సార్లు తిరస్కరించాను. కానీ భారతీయ సినిమా ప్రపంచంలో శివుడిగా నేను బాగుంటాను అని విష్ణు పెట్టుకున్న నమ్మకమే నన్ను ఈ సినిమా ఒప్పుకునేలా చేసింది. కన్నప్ప కథ చాలా శక్తివంతమైంది. ఎంతో లోతైన ఎమోషన్స్ ఉంటాయి. విజువల్ వండర్‌గా ఉండబోతోంది. ఈ అద్భుతమైన ప్రయాణంలో భాగమైనందుకు నేను గౌరవంగా భావిస్తున్నాను’ అని అన్నారు.

కన్నప్ప నా లైఫ్ జర్నీ

విష్ణు మంచు మాట్లాడుతూ.. ‘కన్నప్ప (Kannappa Release Date) కేవలం నాకు ఓ ప్రాజెక్ట్.. ఓ సినిమా కాదు.. ఇది నా జీవిత ప్రయాణం. నేను ప్రస్తుతం భారతదేశంలోని అన్ని జ్యోతిర్లింగాలను సందర్శిస్తున్నాను. కన్నప్ప కథతో నాకు ఆధ్యాత్మిక బంధం ఏర్పడింది. ఇది అచంచలమైన విశ్వాసం, త్యాగానికి సంబంధించిన కథ. ఈ ప్రయాణంలో అక్షయ్ కుమార్, మోహన్‌లాల్, ప్రభాస్ వంటి దిగ్గజాలు మాతో చేరడం నాకు చాలా గర్వంగా ఉంది. ఎందుకంటే భక్తి, దైవిక శక్తితో నిండిన ఈ కథ ప్రపంచవ్యాప్తంగా ఉన్న ప్రతి వ్యక్తికి చేరుతుందని మేము నమ్ముతున్నాం. ఇది సరిహద్దులను దాటి మానవాళి హృదయంతో మాట్లాడే చిత్రం కానుంది’అని అన్నారు.

వేసవిలో కన్నప్ప రిలీజ్

దర్శకుడు ముఖేష్ కుమార్ సింగ్ మాట్లాడుతూ.. ‘అక్షయ్, మోహన్‌లాల్ (Mohan lal), ప్రభాస్ (Prabhas) వంటి దిగ్గజాలను డైరెక్ట్ చేయడం అద్భుతమైన అనుభవం. వారందరూ చాలా సహకరించారు. వారి పాత్రలు తెరపై అద్భుతం చేయబోతోన్నాయి. ఈ చిత్రం పట్ల విష్ణుకున్న ప్యాషన్ గురించి ఎంత చెప్పినా తక్కువే అవుతుంది. ఈ అద్భుతమైన కథ ప్రతిఒక్కరి వద్దకు చేరేలా చూసేందుకు మేము కృషి చేస్తున్నాము’ అని అన్నారు. ఇక కన్నప్ప తెలుగు టీజర్ మార్చి 1న అందరి ముందుకు రాబోతోంది. ఈ చిత్రం ఏప్రిల్ 25, 2025న ప్రపంచ వ్యాప్తంగా థియేటర్లలో విడుదల కానుంది.