admin
ఛత్తీస్‌గఢ్‌లో మరోసారి తుపాకీ మోత మోగింది. ఛత్తీస్‌గఢ్‌-ఒడిశా సరిహద్దుల్లోని గరియాబంద్ జిల్లాలోని కులారీ ఘాట్‌ అటవీ ప్రాంతంలో మావోయిస్టులు, భద్రతా బలగాలకు మధ్య మంగళవారం ఉదయం ఎదురు కాల్పులు జరిగాయి. ఈ ఎన్‌కౌంటర్‌లో 12 మంది మావోయిస్టులు హతమయ్యారు. అంతకుముందు సోమవారం జరిగిన ఎన్‌కౌంటర్‌లో ఇద్దరు మహిళా మావోయిస్టులు మృతిచెందారు. రెండ్రోజులుగా జరుగుతున్న ఎదురుకాల్పుల్లో ఇప్పటి వరకు 14 మావోయిస్టులు హతమయ్యారు.
14 మావోయిస్టులు హతం
సోమవారం సాయంత్రం గరియాబంద్, నౌపాడ జిల్లాల్లో ఛత్తీస్‌గఢ్‌, ఒడిశా భద్రతా బలగాలు సంయుక్తంగా కూంబింగ్ మొదలు పెట్టారు. ఈ క్రమంలో జరిగిన ఎదురుకాల్పుల్లో ఇద్దరు మహిళా మావోయిస్టులు మరణించారు. కూంబింగ్ కొనసాగిస్తున్న భద్రతా బలగాలకు మంగళవారం ఉదయం గరియాబంద్ అటవీ ప్రాంతంలో నక్సల్స్‌ తారసపడటంతో కాల్పులు జరిపారు. ఈ క్రమంలో జరిగిన ఎదురుకాల్పుల్లో 12 మంది మావోయిస్టులు హతమైనట్లు అధికారులు తెలిపారు.
వెయ్యి మందితో కూంబింగ్
ఈ ఆపరేషన్‌లో గరియాబంద్ డీఆర్‌జీ, ఒడిశా ఎస్‌వోజీ దళాలు, 207 కోబ్రా బెటాలియన్‌, సీఆర్‌పీఎఫ్‌ సిబ్బంది సుమారు వెయ్యి మంది పాల్గొన్నట్లు ఉన్నతాధికారులు తెలిపారు. ఇక మృతుల్లో సెంట్రల్‌ కమిటీ మెంబర్‌ మనోజ్‌, స్పెషల్‌ జోనల్‌ కమిటీ మెంబర్‌ గుడ్డుతోపాటు మావోయిస్టు ముఖ్య నేతలు ఉన్నట్లు సమాచారం. ఆపరేషన్‌ ఇంకా కొనసాగుతోందని ఉన్నతాధికారులు వెల్లడించారు.
Desk
swarna boddula
