గర్భగుడిలో ఇదేం పని?.. వివాదంలో సింగర్ మధుప్రియ

‘ఆడపిల్లనమ్మా.. నేను ఆడపిల్లనాని.. బాధపడకమ్మా.. నువ్వు దిగులు చెందకమ్మా…….. పిల్లా రేణుకా పిలగాడొచ్చిండే.. వచ్చిండే’……. వంటి పాటలతో పాపులర్ అయిన గాయని మధుప్రియ (Singer Madhu Priya) తాజాగా మరో వివాదంలో చిక్కుకుంది. ఓ ప్రైవేట్ సాంగ్ ఆల్బమ్ కోసం గర్బగుడిలో షూటింగ్ చేయడం ఇప్పుడు తీవ్ర వివాదాస్పదమవుతోంది.

అసలేం జరిగిందంటే..?

తెలంగాణలోని ప్రసిద్ధు కాళేశ్వర, ముక్తేశ్వర ఆలయానికి (Kalehswaram Temple) ఎంతో ప్రాముఖ్యత ఉంది. నిత్యం ఇక్కడికి రాష్ట్ర నలుమూలల నుంచి పెద్ద ఎత్తున భక్తులు తరలివస్తుంటారు. అయితే ఈ ఆలయం గర్భగుడిలో ఓ భక్తి పాటను షూట్ చేశారు. అది కూడా భక్తులు భారీ ఎత్తున స్వామి దర్శనం కోసం బారులు తీరిన సమయంలో. ఆలయం గర్భగుడి తలుపులు మూసివేసి లోపల సెట్ వేసి మరీ పాట షూటింగ్ చేశారు.

నెట్టింట విమర్శలు

సాంగ్ షూటింగ్ అయ్యే వరకు భక్తులు వేచి ఉండాల్సి వచ్చింది. దీనికి సంబంధించిన వీడియో సోషల్ మీడియాలో వైరల్ అవుతోంది. ఈ క్రమంలో నెటిజన్లు తీవ్రంగా మండిపడుతున్నారు. గర్భగుడిలోకి భక్తులు వెళ్లడానికి సాధారణంగా అనుమతి ఉండదు. అలాంటిది పాట షూటింగ్ చేయడం.. అది కూడా దర్శనాన్ని కాసేపు నిలిపివేసి మరీ. దీంతో ఇప్పుడు మధుప్రియ, ఆమె టీమ్ పై తీవ్ర విమర్శలు వెల్లువెత్తుతున్నాయి. దీనిపై అధికారులు చర్యలు తీసుకోవాలంటూ భక్తులు డిమాండ్ చేస్తున్నారు.