admin
సినిమాల్లోకి వచ్చి దశాబ్ధాల పాటు స్టార్ డమ్ అనుభవించి.. ఇక ఈ పాపులారిటీతో రాజకీయాల్లోకి వెళ్లి చక్రం తిప్పిన ఎంతో మంది నటులను చూశాం. సినిమాను వదిలిపెట్టిన అలా రాజకీయాల్లోకి వెళ్లిన వారిలో కొంతమంది ముఖ్యమంత్రులు కూడా అయ్యారు. మరికొందరేమో పాలిటిక్స్ నిలదొక్కుకోలేక అందులోనే ఉంటుంటే.. మరికొందరు తిరిగి సినీ కళామతల్లి చెంతకు చేరుతున్నారు. అయితే రాజకీయాల నుంచి సినిమాల్లోకి వెళ్లిన వారు మాత్రం చాలా అరుదు. ఇప్పుడు ఆ జాబితాలో చేరబోతున్నారు తెలంగాణలోని ఓ సీనియర్ లీడర్.
సినిమాల్లోకి సీనియర్ లీడర్
కాంగ్రెస్ వర్కింగ్ ప్రెసిడెంట్ జగ్గారెడ్డి (Jaggareddy) గురించి తెలియని వారుండరు. ఆయన సంగారెడ్డికి ఎమ్మెల్యేగా సేవలందించారు. ఆయన తరచూ తన వ్యాఖ్యలతో వార్తల్లో నిలుస్తుంటారన్న విషయం తెలిసిందే. అయితే తాజాగా ఆయన రాజకీయాలకు కాస్త గ్యాప్ ఇచ్చి సినిమాల్లోకి ఎంట్రీ ఇవ్వాలనుకుంటున్నారట. సింపతీతో తాను రాజకీయాల్లోకి రాలేదని చెప్పిన ఆయన త్వరలోనే సినిమాల్లోకి రానున్నట్లు స్వయంగా ప్రకటించారు. దిల్లీలో ఏర్పాటు చేసిన మీడియా చాట్ లో ఆయన ఈ ప్రకటన చేశారు.
జగ్గారెడ్డి వార్ ఆఫ్ లవ్
అతి త్వరలో తాను ఓ తెలుగు ప్రేమకథా చిత్రంలో ప్రత్యేక పాత్రలో కనిపించనున్నట్లు జగ్గారెడ్డి ప్రకటించారు. సినిమాలో మాఫియాను ఎదురించి ఆడపిల్ల పెళ్లి చేసే పాత్రలో నటిస్తున్నట్లు చెప్పారు. ఈ కథలో తన ఒరిజినల్ క్యారెక్టర్ ఉండబోతోందని వెల్లడించారు. వచ్చే ఉగాదికి ఈ సినిమా పూర్తి చేస్తామని తెలిపారు. పీసీసీ, సీఎం రేవంత్ రెడ్డి అనుమతి తీసుకుని నటిస్తానని పేర్కొన్నారు. జగ్గారెడ్డి వార్ ఆఫ్ లవ్ (Jagga Reddy War Of Love) అనేది ఈ సినిమా టైటిల్ అని ప్రకటించారు.
Desk
swarna boddula
