admin
‘బీజేపీ ఎంపీ ఈటల రాజేందర్ (MP Etela Rajender) కు బీఆర్ఎస్ అధినేత కేసీఆర్ (KCR) ఫోన్ కాల్’…. ‘తమతో కలిసి పని చేయాలంటూ ఈటలకు కేసీఆర్ ఆఫర్’.. ఇటీవల ఈ వార్తలు సోషల్ మీడియాలో బాగా వైరల్ అవుతున్నాయి. అయితే దీనిపై తాజాగా మల్కాజిగిరి ఎంపీ, బీజేపీ నేత ఈటల రాజేందర్ స్వయంగా క్లారిటీ ఇచ్చారు. ఇదంతా సోషల్ మీడియాలో తన గురించి జరుగుతున్న తప్పుడు ప్రచారమని స్పష్టం చేశారు.
ఆ పని సోషల్ మీడియా సైకోలది
తనంటే గిట్టని వారు, సోషల్ మీడియా సైకోలు ఇలాంటి ప్రచారం చేస్తున్నారని ఈటల (Eatala Rajendar) అన్నారు. ఇందులో ఎలాంటి నిజం లేదని ఖండించారు. బీఆర్ఎస్, కేసీఆర్ విషయంలో తన స్పష్టమైన అభిప్రాయాన్ని చెబుతూనే ఉన్నా కొంతమంది కావాలనే తనపై దుష్ప్రచారం చేస్తున్నారని ఆరోపించారు. తనపై ఇలాంటి తప్పుడు ప్రచారాలు చేసే వారిపై త్వరలోనే చట్టపరమైన చర్యలు తీసుకుంటానని హెచ్చరించారు.
ఇదేమన్నా పిల్లల ఆటనా?
ఇటీవల ఓ ఇంటర్వ్యూలో పాల్గొన్న ఈటలకు ‘‘మళ్లీ కేసీఆర్ పిలిస్తే వెళ్తారా?’’ అనే ప్రశ్న ఎదురైంది. అయితే దానిపై ఆయన చాలా ఘాటుగా స్పందించారు. ‘‘ఇదేమైనా పిల్లల ఆటనా? మేమంతా బాధ్యత ఉన్న పొలిటికల్ లీడర్లు. వాళ్ల పార్టీ వాళ్లది, మా పార్టీ మాది. బీఆర్ఎస్‌ను ఓడించి తెలంగాణలో బీజేపీ (BJP)ని గెలిపించడం నా లక్ష్యం’’ అని స్పష్టం చేశారు.
Desk
swarna boddula
