తెలంగాణ కొత్త ఇంఛార్జ్ మీనాక్షి నటరాజన్‌.. మేడం సార్ మేడం అంతే

తెలంగాణ రాష్ట్రానికి కొత్తగా నియమితురాలైన ఏఐసీసీ ఇంఛార్జ్ (Telangana AICC Incharge) మీనాక్షి నటరాజన్ (Meenakshi Natarajan) శుక్రవారం ఉదయం రాష్ట్రానికి వచ్చారు. అయితే గల్లీ నాయకులే ఈరోజుల్లో విమానాల్లో తిరుగుతున్న పరిస్థితుల్లో ఏఐసీసీ ముఖ్యనేత, రాహుల్ గాంధీ టీమ్ (Rahul Gandhi)లో కీలక నాయకురాలైన మీనాక్షి సాధారణ వ్యక్తిలా రైల్లో వచ్చారు. అంతే కాదు ఆమె బ్యాగులు ఎవరూ మోయొద్దంటూ తన సామగ్రి తనే స్వయంగా మోసుకుని తీసుకెళ్లారు. అసలైతే తనకు స్వాగతం పలికేందుకు రైల్వే స్టేషన్ కు కూడా రావొద్దని రాష్ట్ర నేతలకు ఆమె సూచించారట. మీనాక్షి సింప్లిసిటీ చూసి రాష్ట్ర కాంగ్రెస్ నేతలే కాదు ప్రజలు కూడా షాక్ అవుతున్నారు.

మీనాక్షి మేడం సార్ మేడం అంతే

ఛాన్స్ దొరికితే చాలు డాబు చూపించే నేతలున్న ఈ రోజుల్లో మీనాక్షి సింప్లిసిటీ చూసి ప్రజలు ఫిదా అవుతున్నారు. ఇలాంటి నాయకులు కదా మనకు కావాల్సింది అంటూ ఈ విషయం తెలిసిన నెటిజన్లు ఈ లీడర్ కు జేజేలు పలుకుతున్నారు. ఎంతైనా మీనాక్షి మేడం సార్ మేడం అంతే అంటూ సోషల్ మీడియాలో కామెంట్లు పెడుతున్నారు. ఇప్పటికే తెలంగాణ కాంగ్రెస్ కు మంచిరోజులు వచ్చాయన్నమాట అంటూ నెట్టింట చర్చించుకుంటున్నారు. అయితే మీనాక్షి నటరాజన్ కేవలం సింప్లిసిటీలోనే కాదు తన విధులు నిర్వర్తించడంలో చాలా స్ట్రిక్ట్ అని తెలిసింది.

వద్దన్నా వినరే

సికింద్రాబాద్ రైల్వే స్టేషన్ కు చేరుకున్న మీనాక్షి నటరాజన్ కు టీపీసీసీ చీఫ్ మహేశ్ కుమార్ గౌడ్ (TPCC Chief Mahesh Kumar Goud) ఘనంగా స్వాగతం పలికారు. అనంతరం ఆమె గాంధీ భవన్ కు చేరుకుని అక్కడ జరుగుతున్న తెలంగాణ ప్రదేశ్ కమిటీ విస్తృత స్థాయి కార్యవర్గ సమావేశంలో పాల్గొన్నారు. అయితే ఈ భేటీ కోసం జరుగుతున్న హడావుడి చూసి ఆమె అసహనం వ్యక్తం చేశారు. ఇక తనకోసం పూలమాలలు, బొకేలు తీసుకురావొద్దని చెప్పినా కొందరు నేతలు పుష్పగుచ్ఛాలు తీసుకురావడం ఆమెకు చిరాకు తెప్పించింది.

నో ఫ్లెక్సీలు.. నో కటౌట్లు

ఈ నేపథ్యంలో ఆమె ఓ కీలక నిర్ణయం తీసుకున్నారు. ఆ నిర్ణయం విని కాంగ్రెస్ నేతలు షాక్ అయ్యారు. ఇక నుంచి గాంధీ భవన్ (Gandhi Bhavan)లో ఎలాంటి ఫ్లెక్సీలు కట్టొద్దని, కటౌట్లు పెట్టకూడదని మీనాక్షి నటరాజన్ రాష్ట్ర నేతలను ఆదేశించారు. రాష్ట్రానికి ఎంట్రీ ఇచ్చిన రోజే గాంధీ భవన్ రూపురేఖలు మార్చేసిన ఈ లీడర్ ను చూసి త్వరలోనే రాష్ట్ర కాంగ్రెస్ లోనూ పెను మార్పులు చోటుచేసుకునే అవకాశం కనిపిస్తోందని పలువురు రాజకీయ విశ్లేషకులు అంటున్నారు.