గ్రూప్​-1 రిజల్ట్స్ అప్డేట్.. 1:2 నిష్పత్తిలో మెరిట్‌ జాబితా ఎప్పుడంటే?

గ్రూప్-1 (TG Group 1) పరీక్షలు రాసిన అభ్యర్థులకు అలర్ట్. రాష్ట్రంలో 563 గ్రూప్‌-1 పోస్టుల భర్తీకి నిర్వహించిన ప్రధాన పరీక్షల జవాబు పత్రాల మూల్యాంకనం విజయవంతంగా ముగిసినట్లు టీజీపీఎస్సీ (TGPSC) అధికారులు తెలిపారు. అభ్యర్థులు సాధించిన మార్కుల ఆధారంగా 1:2 నిష్పత్తిలో మెరిట్‌ జాబితా వెల్లడించేందుకు రంగం సిద్ధం చేస్తున్నట్లు చెప్పారు. వారం, పది రోజుల్లో గ్రూప్-1 ఫలితాలు విడుదల చేయనున్నట్లు పేర్కొన్నారు.

గ్రూపు-1 తర్వాత గ్రూపు-2

ఫలితాల వెల్లడి తర్వాత అభ్యర్థుల సర్టిఫికెట్ వెరిఫికేషన్ ఉంటుంది. గ్రూప్‌-1 మెయిన్స్ (Group 1 Mains) పరీక్షలకు 21,093 మంది హాజరు కాగా.. 563 పోస్టులకు గానూ..  ఒక్కో ఉద్యోగానికి దాదాపుగా 38 మంది పోటీపడుతున్నారు. గ్రూపు-1 పోస్టుల నియామకాలు పూర్తైన తర్వాత గ్రూప్‌-2, గ్రూప్‌-3 (Group 3) పరీక్షల ఫలితాలు వెల్లడించనున్నట్లు టీజీపీఎస్సీ పేర్కొంది. దీని ద్వారా పోస్టుల్లో బ్యాక్‌లాగ్‌లు లేకుండా అర్హులైన వారికి ఉద్యోగ అవకాశాలు కల్పించనున్నట్లు చెప్పింది.

టీజీపీఎస్సీ వెబ్‌సైట్లో ఫలితాలు

గ్రూప్‌-1 మెయిన్స్ (Group 1 Results) పరీక్షల్లో అభ్యర్థులు సాధించిన మార్కుల వివరాలను టీజీపీఎస్సీ వెబ్‌సైట్లో పొందుపరచనున్నారు. ఆరు పేపర్లలో అభ్యర్థులు సాధించిన మార్కులను కలిపి మెరిట్‌ జాబితాతో పాటు ప్రకటించనున్నట్లు టీజీపీఎస్సీ అధికారులు తెలిపారు. సబ్జెక్టుల వారీగా మార్కులను అభ్యర్థుల వ్యక్తిగత లాగిన్‌లో అందుబాటులో ఉంటుందని పేర్కొన్నారు.  మార్కుల లెక్కింపుపై అభ్యర్థులకు సందేహాలుంటే రీకౌంటింగ్‌ ఆప్షన్‌ కల్పించనున్నట్లు వివరించారు.