ఫస్ట్ గ్రూపు-1.. ఆ తర్వాతే గ్రూపు-2,3.. టీజీపీఎస్సీ కీలక నిర్ణయం

Mana Enadu : గ్రూపు-1, గ్రూపు-2, గ్రూపు-3 పరీక్షలు, ఫలితాల విడుదల, పోస్టుల భర్తీ ప్రక్రియలో తెలంగాణ రాష్ట్ర పబ్లిక్ సర్వీస్ కమిషన్ (TGPSC) కీలక నిర్ణయం తీసుకుంది. ఇక నుంచి ఈ విషయాల్లో అవరోహణ క్రమం పాటించాలని నిర్ణయించినట్లు సమాచారం. అక్టోబరు 21 నుంచి 27 వరకు గ్రూప్-1 పరీక్షలు, నవంబరు 17, 18 తేదీల్లో గ్రూపు-3 పరీక్షలు నిర్వహించిన విషయం తెలిసిందే. ఈనెల 15, 16 తేదీల్లో గ్రూపు-2 పరీక్షల నిర్వహణకు ఏర్పాట్లు జరుగుతున్నాయి. 

అవరోహణ క్రమంలో పోస్టుల భర్తీ

మొదట గ్రూపు-1 (Telangana Group-1), అనంతరం గ్రూపు-3, ఆ తర్వాత గ్రూపు-2 పరీక్షలు నిర్వహిస్తున్నారు. అయితే వీటి ఫలితాల విడుదల, పోస్టుల భర్తీ ప్రక్రియ ఈ వరుసలో కాకుండా అవరోహణ క్రమంలో చేపట్టాలని టీజీపీఎస్సీ బోర్డు భావిస్తోంది. అంటే బోర్డు యోచన ప్రకారం.. మొదట గ్రూపు-1 ఫలితాలు విడుదల చేసి పోస్టుల భర్తీ చేపడుతుందన్న మాట. ఆ తర్వాత గ్రూపు-2 ఫలితాలు.. అనంతరం గ్రూపు-3 ఫలితాలు, పోస్టుల భర్తీ ప్రక్రియ చేయాలని నిర్ణయించింది. 

అందుకోసమే ఈ విధానం

సర్కార్ కొలువుల భర్తీలో రీలింక్విష్‌మెంట్‌ విధానం అమల్లో లేదన్న విషయం తెలిసిందే. ఈ క్రమంలో మెరిట్‌ ఉన్న నిరుద్యోగ అభ్యర్థులు అవకాశాలు కోల్పోకూడదని టీజీపీఎస్సీ బోర్డు (TGPSC Latest News) భావిస్తోంది. అందుకోసమే ఈ విధానాన్ని అమలు చేయాలని నిర్ణయించింది. ఉన్నత కేటగిరీ పోస్టుల తరువాత కింది కేటగిరీ పోస్టుల భర్తీ చేపట్టడం ద్వారా బ్యాక్‌ లాగ్‌ను నివారించవచ్చని భావిస్తోంది.

ఫిబ్రవరిలో గ్రూప్-1 మెయిన్స్ రిజల్ట్స్

ఇక ఇప్పటికే పరీక్షలు నిర్వహించిన గ్రూప్‌-1 మెయిన్స్ మూల్యాంకన ప్రక్రియను కమిషన్‌ వేగవంతం చేసినట్లు తెలిసింది. ఫిబ్రవరిలోగా ఈ ఫలితాలు (Group-1 Results) ప్రకటించనుంది. ఆ తర్వాత ధ్రువీకరణ పత్రాల పరిశీలన నిర్వహించి, తుది ఫలితాలు విడుదల చేసి.. మార్చి నాటికి గ్రూప్‌-1 నియామక ప్రక్రియ ముగించాలని భావిస్తోంది.

ఏప్రిల్ నాటికి అన్ని నియామకాలు పూర్తి

గ్రూపు-1 పోస్టుల భర్తీ తర్వాత గ్రూప్‌-2 ఫలితాలు (Telangana Group2 Results) ప్రకటించి, పోస్టుల భర్తీ చేపట్టనుంది. అనంతరం గ్రూప్‌-3 ఫలితాలు విడుదల చేయనుంది. నవంబరు 17, 18 తేదీల్లో గ్రూప్‌-3 (Group-3)లో 1388 పోస్టుల భర్తీ కోసం టీజీపీఎస్సీ పరీక్షలు నిర్వహించిన విషయం తెలిసిందే. వీటి మూల్యాంకన ప్రక్రియ త్వరలో ప్రారంభించాలని కమిషన్ భావిస్తోంది. వచ్చే ఏడాది ఏప్రిల్‌ నాటికి గ్రూప్స్‌ పోస్టుల నియామకాలన్నీ పూర్తి చేయాలనే లక్ష్యంతో కమిషన్ పని చేస్తోంది.