కోల్​కతా ట్రైనీ డాక్టర్​ కేసు.. డెడ్ బాడీపై మహిళ డీఎన్ఏ

దేశవ్యాప్తంగా సంచలనం రేపిన కోల్ కతా ఆర్జీకర్ ఆస్పత్రి ట్రైనీ డాక్టర్ పై (Kolkata Doctor Murder Case) హత్యచారం కేసులో దోషి సంజయ్‌ రాయ్‌కి (Sanjay Roy) న్యాయస్థానం జీవిత ఖైదు విధించిన విషయం తెలిసిందే.  అయితే విచారణలో భాగంగా సెంట్రల్‌ ఫోరెన్సిక్‌ లాబొరేటరీ కోర్టుకు రిపోర్టు సమర్పించింది. ఈ రిపోర్టులోని విషయాలు తాజాగా వెలుగులోకి రాగా.. అందులో ఓ సంచలన అంశం ఇప్పుడు చర్చనీయాంశమవుతోంది. అదేంటంటే.. మృతురాలి శరీరంపై ఓ మహిళ డీఎన్ఏ లభించినట్లు రిపోర్టులో ఉంది.

ఈ నేరంలో వారూ భాగమయ్యారు

జూనియర్ డాక్టర్ అత్యాచారం, హత్య కేసు(RG Kar Hospital Case)లో దోషిగా తేలిన సంజయ్‌ రాయ్‌ డీఎన్ఏ 100 శాతం మృతురాలి శరీరంపై కనుగొన్నట్లు రిపోర్టులో పేర్కొన్నారు. అతడితో పాటు అతికొద్ది స్థాయిలో ఓ మహిళ డీఎన్ఏ కూడా బయటపడినట్లు రిపోర్టులో పేర్కొనడం ఇప్పుడు చర్చనీయాంశమవుతోంది.  అయితే, అది పొరపాటున ఈ డీఎన్‌ఏతో కలిసిందా లేక సదరు మహిళ కూడా ఈ దారుణంలో భాగమైందా అనే విషయంలో క్లారిటీ రావాల్సి ఉంది. అయితే ఈ నేరంలో నలుగురు పురుషులు, ఇద్దరు మహిళల ప్రమేయం ఉన్నట్లు డీఎన్‌ఏ రిపోర్టులో వెల్లడైందని అధికారులు తనకు తెలిపినట్లు మృతురాలి తండ్రి గతంలో ఆరోపణలు చేసిన విషయం తెలిసిందే.

మరో మార్గం లేదు

ఇక విచారణలో భాగంగా జూనియర్ డాక్టర్ (RG Kar Doctor Rape Murder Case) శవపరీక్ష వీడియోను జడ్జి పరిశీలించి.. పోస్టుమార్టం కోసం ఉపయోగించిన వైద్య పరికరాలను పూర్తిస్థాయిలో స్టెరిలైజ్ చేయలేదని అన్నారు.  తగిన సదుపాయాలు లేని కారణంగా వైద్య సిబ్బంది తగిన ప్రొటోకాల్ పాటించలేదని తెలుస్తోందని.. తప్పనిసరి పరిస్థితిలో వారు ఈ విధుల్ని నిర్వర్తించడం మినహా మరో మార్గం లేదని ఆయన వ్యాఖ్యానించారు.

గతేడాది ఆగస్టు 9న

గతేడాది ఆగస్టు 9వ తేదీ రాత్రి ఆర్జీకర్‌ ఆసుపత్రి సెమినార్‌ రూమ్‌లో ఒంటరిగా నిద్రిస్తున్న ట్రైనీ డాక్టర్ (Kolkata Doctor Rape Case) పై జరిగిన హత్యాచార ఘటన దేశవ్యాప్తంగా దుమారం రేపిన విషయం తెలిసిందే. ఆస్పత్రి ఆవరణలోని సీసీటీవీలో నమోదైన దృశ్యాల ఆధారంగా సంజయ్‌రాయ్‌ను పోలీసులు అరెస్ట్‌ చేయగా.. సాక్ష్యాధారాలను పరిశీలించిన న్యాయస్థానం నిందితుడిని దోషిగా తేల్చి అతడికి జీవిత ఖైదును విధిస్తూ తీర్పు వెలువరించింది.