Amitabh Bachchan: ‘మీ పనితీరుకు పెద్ద అభిమానిని’.. అల్లు అర్జున్​కు అమితాబ్​ అభినందనలు

ఐకాన్ స్టార్ అల్లు అర్జున్ (Allu Arjun), సుకుమార్​ కాంబినేషన్​లో వచ్చిన పుష్ప 2 కలెక్షన్లలో రికార్డులు సృష్టిస్తోంది. ప్రస్తుతం ఎక్కడ చూసినా పుష్ప 2 (Pushpa 2) ఫీవర్​ కనిపిస్తోంది. టాలీవుడ్​లోనే కాదు బాలీవుడ్​లోనూ అదరగొడుతోంది. విడుదలైన 3 రోజుల్లోనే ప్రపంచవ్యాప్తంగా రూ.621 కోట్లు వసూలు చేసిందని మూవీ బృందం ప్రకటించింది. మూవీ హిట్​ అవడం, ఇదివరకు తన గురించి బన్నీ మాట్లాడడంపై బాలీవుడ్​ సూపర్​స్టార్​ అమితాబ్​ బచ్చన్​ (Amitabh Bachchan)తాజాగా స్పందించారు. అల్లు అర్జున్​ వర్క్​ అంటే తనకు ఎంతో ఇష్టమన్నారు.

ఈ సినిమా ప్రచారంలో భాగంగా అల్లు అర్జున్​ పలు నగరాల్లో ఈవెంట్లు నిర్వహించిన విషయం తెలిసిందే. ఈ సందర్భంగా ముంబయిలో ఓ ఇంటర్వ్యూలో ఐకాన్​ స్టార్​ మాట్లాడుతూ.. ‘అమితాబ్​ బచ్చన్​ అంటే నాకు ఎంతో ఇష్టం. అమితాబ్​ సినిమాలు చూస్తూ పెరిగా. ఆయన ఎన్నో సంవత్సరాలుగా ఇండస్ట్రీలో స్టార్​గా ఉన్నారు. ఎంతో మంది నటీనటులకు ఆయన స్ఫూర్తి. అమితాబ్​ స్ఫూర్తితోనే నేనూ ముందుకు వెళుతున్నా’ అని అన్నారు.

ఈ వ్యాఖ్యలపై తాజాగా అమితాబ్​ బచ్చన్​ X వేదికగా తాజాగా స్పందించారు. ‘థాక్యూ అల్లు అర్జున్​. మీరు నా అర్హతకు మించి మాట్లాడారు. నిజం చెప్పాలంటే నేను మీ ప్రతిభకు, పనితీరుకు పెద్ద అభిమానిని. మీరు ఇలాగే ఎంతోమందికి స్ఫూర్తిగా నిలవాలి. ఇలాంటి హిట్స్​ మరెన్నో అందుకోవాలని కోరుకుంటున్నా. కంగ్రాట్స్​’ అని తెలిపారు. ఈ పోస్టుకు బన్నీ (Icon Star) స్పందించారు. ‘మీరు మా సూపర్​ హీరో. మీ నుంచి ఇలాంటి ప్రశంసలు నమ్మలేకపోతున్నా. మాపై మీకున్న ప్రేమకు ధన్యవాదాలు’ అని రిప్లై ఇచ్చారు.