Desk
భారత స్వాతంత్ర్య సమరయోధుడు, లోకమాన్య బాలగంగాధర్ తిలక్(Lokmanya Balgangadhar Tilak) మునిమనవడు దీపక్ తిలక్(Deepak Tilak) కన్నుమూశారు. మహారాష్ట్రలోని పూణెలోని నివాసంలో ఆయన ఆరోగ్య సమస్యల కారణంగా తుదిశ్వాస విడిచినట్లు కుటుంబ సభ్యులు తెలిపారు. 85 ఏళ్ల దీపక్ తిలక్, బాలగంగాధర్ తిలక్ వారసత్వాన్ని కొనసాగిస్తూ, సామాజిక, సాంస్కృతిక కార్యక్రమాల్లో చురుకైన పాత్ర పోషించారు. దీపక్ తిలక్, బాలగంగాధర్ తిలక్ స్థాపించిన కేసరి పత్రికతో సంబంధం కలిగి ఉంటూ, జాతీయవాద భావాలను, సామాజిక సంస్కరణలను ప్రోత్సహించారు.
మహారాష్ట్ర సీఎం ఫడణవీస్, ప్రముఖుల సంతాపం
అంతేకాదు, ఆయన దక్కన్ ఎడ్యుకేషనల్ సొసైటీ(Deccan Educational Society)తో కూడా అనుబంధం కలిగి, విద్యా రంగంలో సేవలందించారు. బాలగంగాధర్ తిలక్ ప్రారంభించిన గణేశ్ ఉత్సవాలు, శివాజీ ఉత్సవాల(Shivaji Festival) స్ఫూర్తిని కొనసాగించడంలో దీపక్ కీలక పాత్ర పోషించారు. ఆయన సాహిత్యం, చరిత్రపై ఆసక్తి కలిగి, అనేక వ్యాసాలు, గ్రంథాల ద్వారా భారతీయ సంస్కృతిని పరిరక్షించే ప్రయత్నం చేశారు.దీపక్ తిలక్ మృతి పట్ల మహారాష్ట్ర ముఖ్యమంత్రి దేవేంద్ర ఫడణవీస్(CM Devendra Fadnavis), రాజకీయ నాయకులు, సామాజిక సంస్థలు సంతాపం వ్యక్తం చేశాయి.
“దీపక్ తిలక్ లోకమాన్య తిలక్ ఆశయాలను కొనసాగించిన మహనీయుడు. ఆయన మృతి జాతీయవాద ఉద్యమ చరిత్రకు తీరని లోటు” అని పూణె మేయర్ పేర్కొన్నారు. ఆయన కుటుంబంలో భార్య, ఇద్దరు కుమారులు, ఒక కుమార్తె ఉన్నారు. దీపక్ తిలక్ అంత్యక్రియలు పూణెలో జరిగాయి. ఈ సందర్భంగా అనేక మంది ప్రముఖులు నివాళులు అర్పించారు.
swarna boddula
