దిల్లీ అసెంబ్లీ ఎన్నికల షెడ్యూల్.. పోలింగ్, కౌంటింగ్ తేదీలు ఇవే

2025 కొత్త ఏడాదిలో తొలి ఎన్నికలకు నగారా మోగింది. దిల్లీ అసెంబ్లీ ఎన్నికల షెడ్యూల్ (Delhi Assembly Election Schedule) ను కేంద్ర ఎన్నికల సంఘం ప్రకటించింది. 70 శాసనసభ స్థానాలున్న దిల్లీ అసెంబ్లీకి ఈ ఏడాది ఫిబ్రవరి 23వ తేదీతో గడువు ముగియనుంది. ఈ నేపథ్యంలో కేంద్ర ఎన్నికల ప్రధాన అధికారి రాజీవ్ కుమార్ మీడియా సమావేశం ఏర్పాటు చేశారు. ఈ సందర్భంగా దిల్లీ అసెంబ్లీ ఎన్నికలకు ఒకే విడతలో పోలింగ్ నిర్వహించనున్నట్లు తెలిపారు.

దిల్లీ ఎన్నికల షెడ్యూల్ ఇదే

70 శాసనసభ స్థానాలున్న దిల్లీకి అసెంబ్లీ ఎన్నికల నోటిఫికేషన్ (Delhi Assembly Polls Notification) ను ఈనెల 10వ తేదీన విడుదల చేయనున్నట్లు ఈసీ ప్రకటించింది. ఈనెల 17వ తేదీ వరకు నామినేషన్లు దాఖలు చేసేందుకు గడువు విధించినట్లు తెలిపింది.  ఫిబ్రవరి 5న ఎన్నికలు (Delhi Assembly Election Polling) నిర్వహించనున్నట్లు వెల్లడించింది. ఫిబ్రవరి 8వ తేదీన ఓట్ల లెక్కింపు చేపట్టి ఫలితాలను ప్రకటించనున్నట్లు వివరించింది.

దిల్లీ అసెంబ్లీ ఎన్నికల షెడ్యూల్ వివరాలు ఇవే

1. నోటిఫికేషన్ విడుదల తేదీ : జనవరి 10
2. నామినేషన్ల స్వీకరణకు తుది గడువు: జనవరి 17
3. నామినేషన్ల పరిశీలన: జనవరి 18
4. నామినేషన్ల ఉపసంహరణ గడువు: జనవరి 20
5. పోలింగ్ తేదీ: ఫిబ్రవరి 5
6. ఎన్నికల ఫలితాల తేదీ: ఫిబ్రవరి 8

దిల్లీలో మొత్తం 1.55 ఓటర్లు

దిల్లీలో మొత్తం 1.55 కోట్ల మంది ఓటర్లు ఉండగా.. వీరిలో 2.08 లక్షల మంది తొలి ఓటర్లు ఉన్నట్లు సీఈసీ రాజీవ్ కుమార్ వెల్లడించారు. రాష్ట్ర వ్యాప్తంగా 13,033 పోలింగ్‌ కేంద్రాలను ఏర్పాటు చేయనున్నట్లు చెప్పారు. అన్ని కేంద్రాల్లో వెబ్‌కాస్టింగ్‌ను అందుబాటులో ఉంచనున్నట్లు తెలిపారు. 85 ఏళ్లు పైబడిన వారికి ఇంటి నుంచే ఓటు వేసే సదుపాయాన్ని కల్పిస్తామని పేర్కొన్నారు.