ప్రభాస్ ఫ్యాన్స్‌కి పండుగ: 'ఫౌజీ' రిలీజ్ డేట్ లాక్!

ప్రభాస్(Prabhas) కెరీర్‌లో అత్యంత ముఖ్యమైన మలుపు రాజమౌళి(SS. Rajamouli) దర్శకత్వంలో వచ్చిన బాహుబలి సినిమాతోనే వచ్చింది. బాహుబలి-1, బాహుబలి-2 చిత్రాల ఘనవిజయాలు ఆయనను పాన్ ఇండియా స్టార్‌గా నిలబెట్టాయి. ఆ తర్వాత సాహో, రాధేశ్యామ్, ఆదిపురుష్, సలార్, కల్కి 2898 ఏడీ వంటి చిత్రాలు దేశవ్యాప్తంగా విడుదలయ్యాయి. ఇతర హీరోలు మొత్తం రన్ తర్వాత కూడా రూ.100 కోట్లు దాటలేకపోతుంటే, ప్రభాస్ మాత్రం మొదటి రోజే ఆ మైలురాయిని సులభంగా చేరుకోవడం అలవాటుగా మార్చుకున్నారు. హిట్లు, ఫ్లాపులతో సంబంధం లేకుండా ఆయన క్రేజ్ రోజురోజుకూ పెరుగుతూనే ఉంది.

ప్రస్తుతం ప్రభాస్ చేతిలో పలు భారీ ప్రాజెక్టులు ఉన్నాయి. మారుతి(Maruthi) దర్శకత్వంలో రూపొందుతున్న ‘ది రాజా సాబ్'(The Raja Saab) చిత్రం డిసెంబర్ 5న విడుదల కావాల్సి ఉంది. అయితే, ఇది సంక్రాంతికి వాయిదా పడే అవకాశముందని ఊహాగానాలు వినిపిస్తున్నాయి. అలాగే, హను రాఘవపూడి(Hanu Raghavapudi) దర్శకత్వంలో తెరకెక్కుతున్న ‘ఫౌజీ'( ‘Fauji’ ) పై కూడా భారీ అంచనాలు ఉన్నాయి. స్వాతంత్య్రానికి పూర్వం జరిగే పీరియాడిక్ వార్ డ్రామాగా రూపొందుతున్న ఈ సినిమాలో ప్రభాస్ బ్రిటీష్ ఆర్మీ సైనికుడిగా నటిస్తున్నట్లు సమాచారం. ఈ చిత్రంలో మిథున్ చక్రవర్తి, అనుపమ్ ఖేర్, జయప్రద వంటి సీనియర్ నటులు కీలక పాత్రలు పోషిస్తున్నారు. సోషల్ మీడియా ఇన్‌ఫ్లుయెన్సర్ ఇమాన్వి ఇస్మాయిల్ ఈ సినిమాలో హీరోయిన్‌గా కనిపించనుంది. ఈ చిత్రం వచ్చే ఏడాది ఏప్రిల్ మొదటి వారంలో విడుదల కావచ్చని సినీ వర్గాల్లో చర్చ జరుగుతోంది. త్వరలో దీనిపై అధికారిక ప్రకటన వెలువడే అవకాశం ఉంది.

‘ఫౌజీ’ తర్వాత, ప్రభాస్ సందీప్ రెడ్డి వంగా(Sandeep Reddy Vangaa) దర్శకత్వంలో ‘స్పిరిట్’ (Spirit)సినిమాలో నటించనున్నారు. ఆ తర్వాత ‘సలార్ 2’ మరియు ‘కల్కి 2’ వంటి ప్రాజెక్టులు కూడా మొదలుకానున్నాయి. ఏడాదికి కనీసం రెండు సినిమాలు చేస్తానని అభిమానులకు హామీ ఇచ్చిన ప్రభాస్, ఆరోగ్యం సహకరించకపోయినా షూటింగ్‌లకు హాజరవుతూ నిర్మాతలకు ఇబ్బంది కలగకుండా చూసుకుంటున్నారు.