adminManaEnadu : ఖలిస్థానీ అనుకూలవాది నిజ్జర్‌ (Nijjar Murder Case) హత్య వెనుక భారత ప్రభుత్వ ఏజెంట్ల హస్తం ఉందంటూ కెనడా ప్రధాని జస్టిన్‌ ట్రూడో గతేడాది చేసిన వ్యాఖ్యలతో ఇరు దేశాల మధ్య దౌత్య సంబంధాలు భగ్గుమన్నాయి. ఆ తర్వాత పలు పరిణామాలతో భారత్‌తో దౌత్యసంబంధాలు క్షీణిస్తున్నాయి. అయినా కెనడా (Canada) మాత్రం తన పద్ధతి మార్చుకోవడం లేదు.
ఆ ఆరోపణలు నిరాధారమైనవి
ఈ క్రమంలోనే మరోసారి కెనడా ఇండియాపై నోరు పారేసుకుంది. ఏకంగా కేంద్ర హోం మంత్రి అమిత్ షాపై కెనడా డిప్యూటీ మంత్రి డేవిడ్ మోరిసన్ అసంబద్ధ ఆరోపణలు చేశారు. కెనడాలో ఖలిస్థానీ సానుభూతిపరులపై దాడుల వెనక భారత పాత్ర ఉందంటూ చేసిన ఆరోపణలను భారత్ కొట్టిపారేసింది. అవి అసంబద్ధమైనవని, నిరాధారమైనవని స్పష్టం చేసింది.
దౌత్యపర సంబంధాలపై తీవ్ర ప్రభావం
ఈ వ్యవహారంలో కెనడా అధికారికి సమన్లు జారీ చేసినట్లు భారత విదేశాంగ శాఖ ప్రతినిధి రణధీర్ జైశ్వాల్‌ తెలిపారు. ఇటీవల అట్టావాలో పబ్లిక్ సేఫ్టీ అండ్ నేషనల్ సెక్యూరిటీకి సంబంధించిన స్టాండింగ్ కమిటీ ముందు కేంద్ర హోం మంత్రి అమిత్‌షాపై కెనడా మంత్రి నిరాధారణమైన ఆరోపణలు చేశారని.. దానిపై తీవ్ర నిరసన వ్యక్తం చేసినట్లు వెల్లడించారు. అలాంటి బాధ్యతారాహిత్యమైన ప్రవర్తన దౌత్యపరమైన సంబంధాలపై తీవ్ర ప్రభావం చూపుతుందని పేర్కొన్నారు.
ఇక ఇటీవల నిజ్జర్‌ హత్య కేసు అనుమానితుల జాబితాలో భారత హైకమిషనర్‌ సంజయ్‌కుమార్‌ వర్మ పేరును చేర్చారు. ఈ క్రమంలో ఉద్రిక్తతలు మరింత తీవ్రమవ్వడంతో సంజయ్‌ వర్మ సహా ఆ దేశంలోని మన దౌత్యవేత్తలను భారత్ వెనక్కి పిలిపించింది. మరోవైపు దిల్లీలోని కెనడా తాత్కాలిక హైకమిషనర్‌ సహా ఆరుగురు దౌత్యవేత్తల్ని బహిష్కరించింది. ఇక తాజా ఆరోపణల నేపథ్యంలో మరోసారి భారత్ గట్టిగా బదులిచ్చింది.
Desk
swarna boddula
