రేషన్​కార్డుదారులకు తీపికబురు.. నేటి నుంచి సన్న బియ్యం పంపిణీ

తెలంగాణ ప్రభుత్వం తెల్ల రేషన్ కార్డుదారులకు (White Ration card Holders) తీపికబురు అందించింది. పేదల ఆహార భద్రతకు పెద్దపీట వేసిన సర్కార్.. దారిద్య్ర రేఖకు దిగువన ఉన్న తెల్ల రేషన్ కార్డు కలిగిన కుటుంబాలకు సన్న బియ్యం (Thin Rice) పంపిణీ చేయాలని నిర్ణయించింది. ఈరోజు నుంచి హైదరాబాద్‌ మినహా అన్ని జిల్లాల్లో ఈ కార్యక్రమం  ప్రారంభం కానుంది. రాష్ట్ర జనాభాలో 85 శాతం మంది పేదలకు ఈ సన్న బియ్యం పంపిణీ కానుంది.

ఒక్కరికి 6 కిలోల సన్నబియ్యం

దారిద్య్ర రేఖకు దిగువన ఉన్న తెల్ల రేషన్ కార్డు కలిగిన కుటుంబాల్లో ప్రతి ఒక్కరికీ 6 కిలోల చొప్పున సన్న బియ్యం అందించనున్నారు. మంగళవారం (ఈరోజు) రోజున ఆయా జిల్లాల్లో మంత్రులు, ఎమ్మెల్యేలు, ఎమ్మెల్సీల చేతుల మీదుగా సన్న బియ్యం పంపిణీ చేసేందుకు పౌర సరఫరాల శాఖ రంగం సిద్ధం చేసింది. ఇప్పటికే అన్ని జిల్లాల్లో 17500 పైగా ఛౌక ధరల దుకాణాలకు  ఈ శాఖ సన్న బియ్యం పంపించింది. 2.85 కోట్ల మంది లబ్ధిదారులు సన్న బియ్యాన్ని పొందనున్నారు.

3.10 కోట్ల లబ్ధిదారులు

ఇక ఇటీవల ప్రభుత్వం ఇచ్చిన అవకాశంతో రేషన్ కార్డు లేని కుటుంబాలు చేసుకున్న దరఖాస్తుల 30 లక్షల వరకు వచ్చినట్లు సమాచారం. త్వరలో వారికి కొత్త రేషన్ కార్డులు జారీ చేయనున్నారు. దీంతో సన్న బియ్యం లబ్ధిదారుల సంఖ్య 3.10 కోట్లకు చేరుతుంది. దీంతో మొత్తం 85 శాతం పేదలకు నాణ్యమైన సన్నబియ్యం అందుతుంది. ఇక ఇప్పటికే రాష్ట్రవ్యాప్తంగా నాణ్యమైన సన్న బియ్యం పంపిణీ విధానాల మార్పు గురించి ఛౌక ధరల దుకాణాల డీలర్లకు పౌర సరఫరాల శాఖ అవగాహన కల్పించింది.