‘ఆయన జర్మనీ పౌరుడే’.. చెన్నమనేనికి హైకోర్టు షాక్​

వేములవాడ మాజీ ఎమ్మెల్యే చెన్నమనేని రమేశ్​కు తెలంగాణ హైకోర్టులో (Telangana Hihg Court) చుక్కెదురైంది. కోర్టును తప్పుదోవ పట్టించినందుకు ఆగ్రహం వ్యక్తం చేసింది. పౌరసత్వం కేసులో దాఖలు చేసిన పిటిషన్​ను డిస్మిస్ చేసింది. చెన్నమనేని రమేశ్​ (hennamaneni Ramesh) జర్మనీ పౌరుడేనని తేల్చిచెప్పింది. తప్పుడు సమాచారం ఇచ్చారని రూ.30 లక్షల జరిమానా విధించింది.

15 ఏండ్లుగా తప్పుదోవ.. కోర్టు ఆగ్రహం
తప్పుడు సమాచారంతో ఎన్నికల్లో పోటీ చేశారని కాంగ్రెస్​ అభ్యర్థిగా ఉన్న ఆది శ్రీనివాస్​ (Aadi srinivas) 15 ఏండ్ల క్రితం చెన్నమనేని రమేశ్​పై తెలంగాణ హైకోర్టులో పిటిషన్​ దాఖలు చేశారు. మాజీ ఎమ్మెల్యే పౌరసత్వానికి సంబంధించిన కేసు 15 ఏళ్లపాటు హైకోర్టులో సుదీర్ఘ విచారణ జరిగింది. ఆ పిటిషన్‌పై సోమవారం సైతం హైకోర్టులో విచారణ చేపట్టింది. ఈ నేపథ్యంలోనే రమేశ్​పై కోర్టు కీలక వ్యాఖ్యలు చేసింది. ఆయన జర్మనీ పౌరుడేనని (German citizenship) స్పష్టం చేసింది. ఇప్పటికీ జర్మనీ పాస్​పోర్ట్​ మీదనే రాకపోకలు సాగిస్తున్నారని గుర్తించింది.

30 లక్షల జరిమానా
విచారణ సమయంలో చెన్నమనేని రమేశ్​ కోర్టుకు తప్పుడు సమాచారం ఇవ్వడంతో పాటు ఫేక్ డాక్యుమెంట్లు సమర్పించారని కోర్టు మండిపడింది. మాజీ ఎమ్మెల్యేకు రూ.30 లక్షల జరిమానా విధించింది. ఈ మొత్తంలో ప్రస్తుత ఎమ్మెల్య ఆది శ్రీనివాస్‌కు రూ.25 లక్షలు చెల్లించాలని, మరో రూ.5 లక్షలు హైకోర్టు లీగల్ సర్వీస్ అథారిటీకి చెల్లించాలని హైకోర్టు ఆదేశాలు జారీ చేసింది. నెల రోజుల్లో చెల్లింపులు పూర్తిచేయాలని స్పష్టం చేసింది.