admin
అక్కడెక్కడో చైనాలో బర్డ్ ఫ్లూ (Bird Flu) వచ్చిందంటే ఇక్కడ మనం చికెన్ తినడం మానేస్తాం. మరి ఇక్కడే కోళ్లకు ఏదైనా రోగం వస్తే ఇక మాంసం జోలికి వెళ్తామా..? ప్రస్తుతం ఇలాంటి పరిస్థితే ఎదురైంది ఏపీలోని తూర్పు గోదావరి జిల్లాలో. ఈ జిల్లాలో కోళ్లకు అంతుచిక్కని వ్యాధి సోకుతుండటంతో ఇటు పౌల్ట్రీ రైతులు (Poultry Farmers).. అటు వినియోగదారులు ఆందోళన చెందుతున్నారు. ఒక్కో కోడి 300 రూపాయలు వరకు ధర పలుకుతుండగా.. ప్రస్తుతం అవి మృత్యు వాత పడకుండా రక్షించుకునేందుకు టీకాలు వేయిస్తున్నారు.
వైరస్ దెబ్బకు రైతులు విలవిల
సాధారణంగా ఒక బ్రాయిలర్ కోడి (Broiler Chicken) రెండు కిలోల బరువు వచ్చే వరకు రైతుకు 200 రూపాయల వరకు ఖర్చవుతోంది. ఇక ఇటీవల కిలో చికెన్ ధర 140 రూపాయలు వరకు ఉండడంతో లాభాలపై ఆశలు పెట్టుకున్న రైతులకు కొత్త వైరస్ షాక్ ఇచ్చింది. అంతుచిక్కని వ్యాధితో కోళ్లు మృత్యువాత పడుతుండటంతో రైతులు నష్టపోతున్నారు. ముఖ్యంగా అనపర్తి, కొవ్వూరు ప్రాంతాల్లో కొన్నిచోట్ల కోళ్లలో వైరస్ (Virus in Broiler Chicken) జాడలు కనిపించాయి.
చికెన్ తినొచ్చు
అయితే ఈ వైరస్ ప్రభావం వల్ల గుడ్లు (Eggs), మాంసం (Meat) తినే ప్రజల ఆరో గ్యానికి ఎటువంటి ఇబ్బంది లేదని పశుసంవర్ధక శాఖ అధికారులు అంటున్నారు. ప్రజలంతా నిశ్చింతగా ఈ కోడి మాంసం తినొచ్చని చెబుతున్నారు. మన దేశంలో ఉడక బెట్టినవి తినడం అలవాటు కాబట్టి కోళ్ల వల్ల ఇప్పటివరకు ఎవరూ ఇబ్బందులు పడ్డ దాఖలాలు లేవని అన్నారు. ఈ కోళ్ల నమూనాలు సేకరించి ల్యాబ్ కు పంపినట్లు అధికారులు తెలిపారు. రిపోర్టు వచ్చిన తర్వాత వైరస్ పై క్లారిటీ వస్తుందని వెల్లడించారు.
Desk
swarna boddula
