Biren Singh: మణిపూర్​ సీఎం ఇంటి వద్ద బాంబు కలకలం

Mana Enadu : ఈశాన్య రాష్ట్రం మణిపుర్‌లో (Manipur) అల్లర్లు ఆగడంలేదు. రెండు తెగల మధ్య ఘర్షణ కారణంగా ఏడాదిన్నరగా ఆ రాష్ట్రం అట్టుడికిపోతోంది. హింసాత్మక ఘటనలు, బాంబు దాడులు జరుగుతూనే ఉన్నాయి. ఈ నేపథ్యంలో ఏకంగా ఆ రాష్ట్ర ముఖ్యమంత్రి బీరేన్​ సింగ్​ (Manipur CM Biren Singh) ఇంటి వద్దే బాంబు కనిపించడం కలకలం రేపింది.

51 ఎంఎం మోర్టార్​ బాంబ్​

రాష్ట్ర రాజధాని ఇంపాల్​లోని కొయిరెంగేయ్‌ ప్రాంతంలో ఉన్న సీఎం బీరేన్‌ సింగ్‌ (Biren Singh) ప్రైవేట్​ నివాసానికి కొన్ని మీటర్ల దూరంలో మంగళవారం తెల్లవారుజామున ఓ మోర్టార్‌ బాంబును స్థానికులు గుర్తించారు. దీంతో భయాందోళనకు గురై వెంటనే పోలీసులకు సమాచారమిచ్చారు. దీంతో హుటాహుటిన ఘటనా స్థలానికి చేరుకున్న పోలీసులు 51 ఎంఎం మోర్టార్​ బాంబును (Mortar Bomb) నిర్వీర్యం చేశారు. ఆ బాంబును మంగళవారం రాత్రి ప్రయోగించి ఉంటారని, అది పేలకుండా ఇక్కడ పడిపోయి ఉండవచ్చని స్థానికులు అనుమానిస్తున్నారు.

ఎవరు ప్రయోగించారు?

ఈ నేపథ్యంలో సీఎం ఇంటి వద్ద భద్రతను మరింత పెంచారు. ఘటనపై పోలీసులు దర్యాప్తు చేపట్టారు. బాంబు ఎక్కడి నుంచి తీసుకొచ్చారు? ఎవరు ప్రయోగించి ఉంటారు? అన్న కోణంలోను దర్యాప్తు చేస్తున్నారు.