కెనడా ప్రధాని ట్రూడో రాజీనామా.. రేసులో భారత సంతతి నేతలు

దేశంలో రాజకీయ అనిశ్చితి నెలకొన్న దృష్ట్యా, తీవ్ర విమర్శలు ఎదుర్కొంటున్న కెనడా ప్రధాని జస్టిన్ ట్రూడో (Justin Trudeau) ప్రధానమంత్రి పదవికి రాజీనామా చేయనున్నట్లు ప్రకటించారు. లిబరల్‌ పార్టీ నాయకత్వ బాధ్యతల నుంచీ వైదొలగనున్నట్లు ఆయన తెలిపారు. తదుపరి నాయకుడిని తమ పార్టీ ఎంపికచేసే వరకూ ప్రధాని పదవిలో కొనసాగుతానని పేర్కొంటూ.. కొత్త నేతను ఎన్నుకునే వరకు కెనడా పార్లమెంటు (Canada Parliament)ను సస్పెండ్​ చేస్తున్నట్లు ప్రకటించారు. మార్చి 24వ తేదీ వరకూ కొనసాగుతుందని పేర్కొన్నారు.

రేసులో భారత సంతతి నేతలు

ఈ నేపథ్యంలో కెనడా (Canada Next PM) తదుపరి ప్రధాని ఎవరనేది ఆసక్తికరంగా మారింది. ఈ రేసులో ఇద్దరు భారత సంతతి నేతల పేర్లు ఎక్కువగా వినిపిస్తున్నాయి. తదుపరి ప్రధాని రేసులో లిబరల్‌ పార్టీ నేతలు క్రిస్టినా ఫ్రీలాండ్‌, మార్క్‌ కార్నీ, డొమినిక్‌ లీ బ్లాంక్‌, మెలనీ జోలీ, ఫ్రాంకోయిస్‌ ఫిలిప్పీ, క్రిస్టీ క్లార్క్‌తో పాటు భారత సంతతి ఎంపీలు (Indian Origin MPs) అనిత ఆనంద్‌, జార్జ్‌ చాహల్‌ ఈ లిస్టులో ఉన్నారు.

అనితా ఆనంద్

తమిళ్‌, పంజాబీ మూలాలున్న 57ఏళ్ల అనితా ఆనంద్‌ (Indian Origin MP Anita Anand) 2019లో ఓక్‌విల్లే నుంచి ఎంపీగా ఎన్నికై ట్రూడో కేబినెట్‌లో చోటు సంపాదించారు. 2019 నుంచి 2021 వరకు ప్రజాసేవల మంత్రిగా, మరో రెండేళ్ల పాటు రక్షణమంత్రిగా పని చేశారు. మంత్రివర్గ పునర్‌వ్యవస్థీకరణ తర్వాత రవాణా, అంతర్గత వాణిజ్య వ్యవహారాల మంత్రిగా బాధ్యతలు స్వీకరించారు.  అనిత తండ్రి తమిళనాడుకు చెందిన ఫిజీషియన్‌, తల్లి పంజాబీకి చెందినవారు.

జార్జ్‌ చాహల్‌..

భారత సంతతికి చెందిన జార్జ్ చాహల్‌ (George Chahal) ప్రస్తుతం హౌస్‌ ఆఫ్‌ కామన్స్‌ సభ్యుడిగా ఉన్నారు. సహజ వనరులపై ఏర్పాటు చేసిన స్టాండింగ్‌ కమిటీకి ఈయన నేతృత్వం వహించిన చాహల్.. సిక్కుల కాకస్‌కు అధ్యక్షుడిగానూ సేవలందించారు. చాహల్‌ను లిబరల్‌ పార్టీ లెజిస్లేటివ్‌ కాకస్‌ తాత్కాలిక నేతగా నియమించడంతో ఆయన పార్టీ నాయకుడిగా గెలిచినా ప్రధాని పదవి చేపట్టేందుకు అర్హుడు కాదని సమాచారం. మరి వీరందరిలో లిబరల్‌ పార్టీ లీడర్ ఎవరవుతారో తెలియాలంటే కొన్నాళ్లు వేచి చూడాల్సిందే.