admin
అమెరికా అధ్యక్షుడిగా ప్రమాణస్వీకారం చేయడానికి ముందు డొనాల్డ్ ట్రంప్ (Donald Trump) సంచలన ప్రకటన చేశారు. వాషింగ్టన్‌ డీసీలో ఆదివారం విక్టరీ ర్యాలీ నిర్వహించిన అనంతరం ఆయన ప్రసంగిస్తూ కీలక వ్యాఖ్యలు చేశారు. ఎన్నికల ప్రచారంలో ఇచ్చిన హామీలను తన హయాంలో నెరవేరుస్తామని చెబుతూనే.. సోమవారం సూర్యుడు అస్తమించే సమయానికి అమెరికాపై దాడి ఆగిపోతుందని.. తమ దేశాన్ని తాము తిరిగి స్వాధీనం చేసుకోబోతున్నామంటూ ప్రకటించారు.
సరికొత్త రోజు ప్రారంభం
అమెరికన్‌ బలం, శ్రేయస్సు, గౌరవం, గర్వంతో సరికొత్త రోజును ప్రారంభించనున్నామని ట్రంప్ (Donald Trump Oath) పేర్కొన్నారు. చరిత్రలో కనీవినీ ఎరుగనివిధంగా అక్రమ వలసదారులను బయటకు పంపిస్తానని చెప్పారు. “జాన్‌ ఎఫ్‌ కెనడీ, రాబర్ట్ ఎఫ్‌ కెనడీ, మార్టిన్‌ లూథర్‌ కింగ్ జూనియర్‌ హత్య కేసు ఫైళ్లను బహిర్గతం చేస్తాను. అధ్యక్షుడిగా బాధ్యతలు స్వీకరించగానే జో బైడెన్ తీసుకున్న నిర్ణయాలు ఏవీ అమలు కాకుండా చూస్తాను.” అని ట్రంప్ స్పష్టం చేశారు.
టిక్టాక్ కు గుడ్ న్యూస్
మరోవైపు షార్ట్‌ వీడియో యాప్‌ టిక్టాక్ (TikTok) సేవలకు సంబంధించి ట్రంప్ కీలక ప్రకటన చేశారు. టిక్టాక్ కంపెనీలో కనీసం 50 శాతం వాటా అమెరికా పెట్టుబడిదారుల చేతిలో ఉండేలా షరతులు విధిస్తానని.. దానికి అంగీకరిస్తేనే ఎగ్జిక్యూటివ్‌ ఆర్డర్‌ ద్వారా వాటి సేవలను పునరుద్ధరించనున్నట్లు తెలిపారు. ట్రంప్ నుంచి భరోసా లభించడంపై టిక్‌ టాక్‌ సంస్థ కృతజ్ఞతలు తెలిపింది.
Desk
swarna boddula
