admin
తెలంగాణ శాసనసభ సమావేశాలు (Telangana Assembly Sessions 2024) ఆరోరోజు వాడివేడిగా సాగుతున్నాయి. ఇవాళ్టి సభలో ఫార్ములా ఈ రేసు వ్యవహారంపై చర్చ చేపట్టాలని బీఆర్ఎస్ సభ్యులు ఆందోళనకు దిగారు. ఈ నేపథ్యంలో ముఖ్యమంత్రి రేవంత్ రెడ్డి (CM Revanth Reddy) మాట్లాడుతూ.. విపక్ష పార్టీ అహంభావంతో వ్యవహరిస్తోందని మండిపడ్డారు. స్పీకర్ పట్ల కూడా దారుణంగా వ్యవహరించారని ధ్వజమెత్తారు.
ప్రతి సమస్య భూమితోనే ముడిపడింది
“తెలంగాణలో ప్రతి సమస్య భూమితోనే ముడిపడి ఉంది. రావి నారాయణ, బద్దం ఎల్లారెడ్డి, మల్లు స్వరాజ్యం వంటి వారు భూపోరాటాలు చేశారు. తెలంగాణలో ప్రజల ఆత్మగౌరవం నిలబెట్టేది భూమి. భూమిని కాపాడుకునే ప్రయత్నంలో దొడ్డి కొమురయ్య వంటి వారు ప్రాణాలు కోల్పోయారు. సర్వం ఒడ్డి పోరాటాలు చేసి భూములు కాపాడుకున్నారు.
పేదల భూములు రక్షించేందుకే పటేల్‌, పట్వారీ వ్యవస్థ రద్దు చేశారు. భూమి లేని పేదలకు ఇందిరా గాంధీ ప్రభుత్వం భూమి ఇచ్చి ఆత్మగౌరవం నిలబెట్టింది. ఆక్రమణలు తొలగించి రైతుల హక్కులు కాపాడేందుకు గత ప్రభుత్వాలు ఎన్నో చట్టాలు తెచ్చాయి. గత ప్రభుత్వం తెచ్చిన ‘ధరణి (Dharani Portal)’ మాత్రం రైతులను తమ భూములకు దూరం చేసింది.” అని రేవంత్ అన్నారు.
యువరాజు సన్నిహితుడి చేతిలో ధరణి
గత కేసీఆర్ సర్కార్ (KCR Govt) కేటీఆర్ కు సన్నిహితుడైన గాదె శ్రీధర్‌రాజు కంపెనీకి ధరణి పోర్టల్ నిర్వహణను అప్పగించిందని.. అవకతవకలకు పాల్పడిన సంస్థకు ధరణి పోర్టల్ బాధ్యతను అప్పగించారని ముఖ్యమంత్రి మండిపడ్డారు. ధరణి టెండర్‌ దక్కగానే ఈ సంస్థ పేరు, యాజమాన్యం మారిందని.. ఫాల్కన్‌ హెచ్‌బీ అనే ఫిలిప్పీన్‌ కంపెనీ, తర్వాత సింగపూర్‌ కంపెనీ ఇందులోకి వచ్చాయని చెప్పారు. 50 లక్షల మంది రైతులు, వారి భూముల వివరాలను ట్యాక్స్‌ హెవెన్‌ దేశాల కంపెనీల చేతిలో పెట్టారని ఆరోపించారు.
అహంకారంతో విపక్ష పార్టీ
విపక్ష పార్టీ అహంభావంతో, అహంకారంతో వ్యవహరిస్తోందని సీఎం రేవంత్ అన్నారు. సభా మర్యాదలను ఉల్లంఘించి సభాపతి (Telangana Speaker)పైనే దాడి చేసే ధోరణిలో చర్చను అడ్డుకోవడానికి ప్రయత్నించిందని ఆరోపించాచరు. రెచ్చగొట్టడం ద్వారా భూ భారతి బిల్లు (Bhu Bharati Bill)పై చర్చను పక్కదోవ పట్టించాలని ప్రయత్నించినా స్పీకర్ చాలా ఓర్పుతో వ్యవహరించారని ప్రశంసించారు. తెలంగాణ రైతాంగానికి ఉపయోగపడే కీలకమైన, ముఖ్యమైన బిల్లుపై చర్చ జరిగే విధంగా కృషి చేసిన స్పీకర్ కు సీఎం కృతజ్ఞతలు తెలిపారు.
Desk
swarna boddula
