బిగ్ బ్రేకింగ్.. ఎల్లుండి అసెంబ్లీకి కేసీఆర్

ఈ నెల 12వ తేదీ నుంచి తెలంగాణ శాసనసభ (Assembly Sessions), శాసనమండలి సమావేశాలు ప్రారంభం కానున్నాయి.  బుధవారం ఉదయం 11 గంటలకు అసెంబ్లీ హాలులో గవర్నర్‌ (Governor Jishnu Dev Varma) జిష్ణుదేవ్‌ వర్మ ఉభయ సభలనుద్దేశించి ప్రసంగిస్తారు. ఈ నేపథ్యంలో 12వ తేదీన అసెంబ్లీకి మాజీ సీఎం, ప్రతిపక్ష నేత కేసీఆర్ రానున్నట్లు సమాచారం. గవర్నర్ ప్రసంగానికి కేసీఆర్ హాజరవుతారని బీఆర్ఎస్ పార్టీ కార్యనిర్వాహక అధ్యక్షుడు కేటీఆర్ తెలిపారు.

కేసీఆర్ రాకపోవడమే మంచిది

తాజాగా మీడియాతో చిట్ చాట్ నిర్వహించిన కేటీఆర్ (KTR).. ఎల్లుండి అసెంబ్లీ సమావేశాలకు కేసీఆర్ రాబోతున్న విషయాన్ని తెలిపారు. గవర్నర్ ప్రసంగంతో పాటు మరికొన్ని కార్యక్రమాలకు కూడా ఆయన వస్తారని వెల్లడించారు. అయితే కేసీఆర్ (KCR) స్థాయి వేరని, పనికిమాలిన మాటలు వినడానికి ఆయన అసెంబ్లీకి రాకపోవడమే మంచిదని తన అభిప్రాయమని కేటీఆర్ సంచలన వ్యాఖ్యలు చేశారు. కాంగ్రెస్ పార్టీలో కేసీఆర్ స్థాయికి సరిపోయే నాయకుడే లేరని కేటీఆర్ అన్నారు.

ఉభయ సభల్లో ప్రవేశపెట్టే బిల్లులు ఇవే

ఇక అసెంబ్లీ సమావేశాల్లో గవర్నర్ ప్రసంగం అనంతరం బిజినెస్‌ అడ్వైజరీ కమిటీ(BAC) సమావేశం ఉంటుంది. ఈ భేటీలో సమావేశాలు ఎన్ని రోజులు నిర్వహించాలి? బడ్జెట్‌ (Telangana Budget 2025) ఎప్పుడు ప్రవేశ పెట్టాలి? వంటి కీలక విషయాలపై నిర్ణయం తీసుకుంటారు. ఇక ఆ తర్వాత గవర్నర్‌ ప్రసంగానికి ధన్యవాదాలు తెలిపే తీర్మానంపై చర్చ, సమాధానం ఉంటాయి. ఎస్సీ వర్గీకరణ (SC Classification Bill), విద్య, ఉద్యోగ, స్థానిక సంస్థల్లో బీసీలకు 42% రిజర్వేషన్లకు సంబంధించిన బిల్లులను ఈ సమావేశాల్లోనే ప్రభుత్వం ప్రవేశపెట్టనున్నట్లు ప్రభుత్వ వర్గాలు తెలిపాయి.