admin
Mana Enadu : ప్రపంచ ఆరోగ్య సంస్థ (WHO) డైరెక్టర్ జనరల్‌ టెడ్రోస్ అధానోమ్ ( Tedros Adhanom) బాంబు దాడి నుంచి త్రుటిలో తప్పించుకున్నారు. యెమెన్‌ (Yemen)లోని సనా అంతర్జాతీయ విమానాశ్రయంలో విమానం ఎక్కేందుకు వేచి ఉండగా ఇజ్రాయెల్ వైమానిక బాంబు దాడికి దిగింది. ఈ ఘటనలో ఇద్దరు ప్రాణాలు కోల్పోయారు. ఈ దాడిని ఐక్యరాజ్యసమితి ఖండించింది.
మాకు చాలా దగ్గరలోనే బాంబు దాడి
ఐక్యరాజ్యసమితికి చెందిన ఉద్యోగులతో కలిసి ఖైదీల విడుదలపై చర్చలు, యెమెన్‌లో ఆరోగ్యం, మానవతా పరిస్థితులను అంచనా వేసేందుకు టెడ్రోస్ అధానోమ్ (WHO Head Attack News) ఎక్స్ వేదికగా తెలిపారు. ఖైదీలను తక్షణమే విడుదల చేయాలని మేము పిలుపునిచ్చామని చెప్పారు. సనాలో విమానం ఎక్కేందుకు వేచిఉండగా బాంబు దాడి జరిగిందని టెడ్రోస్ వెల్లడించారు. ఈ ఘటన జరిగిన ప్రాంతానికి, తమకు కొన్ని మీటర్ల దూరం మాత్రమే ఉందని పేర్కొన్నారు. ఈ దాడిలో ప్రాణాలు కోల్పోయిన కుటుంబాలకు సంతాపం తెలియచేస్తున్నామని అధానోమ్ ఎక్స్‌లో పోస్ట్ చేశారు.
ఆ దాడులు ఆందోళనకరం
మరోవైపు ఈ దాడిని ఐరాస సెక్రటరీ జనరల్‌ ఆంటోనియో గుటెరస్‌ (Antonio Guterres) ఎక్స్ వేదికగా ఖండించారు. ఇటీవల యెమెన్‌, ఇజ్రాయెల్‌ల మధ్య దాడులు తీవ్రతరం అయ్యాయని.. సనా అంతర్జాతీయ విమనాశ్రయంతో సహా ఎర్రసముద్రం, ఓడరేవులు, యెమెన్‌లో పవర్ స్టేషన్‌లపై వైమానిక దాడులు ఆందోళనకరంగా ఉన్నాయని ఆయన ఆవేదన వ్యక్తం చేశారు. ఈ సందర్భంగా అంతర్జాతీయ చట్టాలను గౌరవించాలని.. పౌరులు, మానవతా కార్మికులే లక్ష్యంగా దాడులు చేయకూడదని చెప్పారు.
హౌతీలను టార్గెట్ చేసిన ఇజ్రాయెల్
యెమెన్‌లోని సనా విమానాశ్రయం (Sanaa Airport Airstrike), నౌకాశ్రయాలు, పలు విద్యుత్కేంద్రాలపై గురువారం రోజున ఇజ్రాయెల్ (Israel) వైమానిక దాడులకు తెగబడింది. గత కొన్ని రోజులుగా హూతీలు.. ఇజ్రాయెల్‌పై క్షిపణి దాడులు చేస్తుండగా.. హూతీలను టెల్‌ అవీవ్‌ టార్గెట్ చేసింది. తాజా దాడులను ఇతర సైనికాధికారులతో కలిసి నెతన్యాహు పర్యవేక్షించినట్లు ఇజ్రాయెల్ సర్కార్ వెల్లడించింది.
Desk
swarna boddula
