‘ఇందిరమ్మ ఇళ్లు స్కీమ్’ కీలక అప్​డేట్.. అలా చేస్తే మీరు అనర్హులే!

తెలంగాణ సర్కార్ (Telangana Govt) ప్రతిష్ఠాత్మకంగా చేపట్టిన ‘ఇందిరమ్మ ఇళ్లు పథకం’ (Indiramma Illu Scheme)పై కీలక అప్డేట్ ఇచ్చింది రాష్ట్ర ప్రభుత్వం. ఇందిరమ్మ ఇళ్ల పథకంలో చేపట్టే గృహ నిర్మాణంలో ప్రభుత్వం నిర్ణయించిన విస్తీర్ణం మించితే అనర్హుల కిందే గుర్తిస్తున్నారు. అవగాహన లోపంతో ఉన్నంత స్థలంలో ఇంటి నిర్మాణం చేపట్టిన వారు ఈ విషయం తెలిసి ఇప్పుడు నిరాశ చెందుతున్నారు. అయితే ఇంటి నిర్మాణంపై, ఈ పథకంపై సరైన అవగాహన కల్పించకపోవడం వల్లే ఈ సమస్య ఎదురవుతోందని లబ్దిదారులు వాపోతున్నారు. ఇప్పుడు ఏం చేయాలో పాలుపోవడం లేదని వాపోతున్నారు.

ఇందిరమ్మ ఇళ్లు స్కీమ్ 

ఇందిరమ్మ ఇళ్లు పథకంలో భాగంగా సొంత ఇంటి స్థలం (Own Land) కలిగి ఉన్న పేదవారు 400 నుంచి 600 చదరపు అడుగుల విస్తీర్ణంలో ఇల్లు నిర్మించుకోవచ్చని రాష్ట్ర ప్రభుత్వం తెలిపిన విషయం తెలిసిందే. ఇందుకోసం లబ్దిదారులకు పలు విడతల్లో రూ.5 లక్షల ఆర్థిక సాయం అందించనున్నట్లు వెల్లడించింది. కొందరు మాత్రం 600 చదరపు అడుగులకు మించి నిర్మాణం చేపట్టిన వారికి  మొదటి విడతగా పునాది స్థాయిలో చెల్లించే రూ.లక్ష నిలిపివేస్తున్నారు.

వారికి చెల్లింపులు కట్

600 చదరపు అడుగుల స్థలం మించి నిర్మాణం చేపట్టిన వారు పేదలు కాదని అందుకే వారికి ఈ పథకం (Indiramma Housing Scheme) వర్తించదని చెల్లింపులను నిలిపివేసినట్లు ప్రభుత్వం పేర్కొంది. అయితే తాము సొంత స్థలం ఉందని నిర్మాణం చేపట్టామని.. కానీ తాము ధనికులం కాదని 600 చదరపు అడుగుల స్థలం మించి ఇల్లు నిర్మించిన వారు వాపోతున్నారు. అవగాహన లేక తప్పు చేశామని.. నిబంధనలు తెలిసుంటే ఇలా జరిగేది కాదని ఆవేదన వ్యక్తం చేశారు.