హమాస్ చీఫ్‌ హనియాను మేమే చంపేశాం: ఇజ్రాయెల్‌

Mana Enadu : గత కొంతకాలంగా ఇజ్రాయెల్, హమాస్ (Israel Hamas War) ల మధ్య జరుగుతున్న యుద్ధంతో పశ్చిమాసియా అట్టుడుకుతోంది. హమాస్ ను సమూలంగా నాశనం చేయడమే లక్ష్యంగా గాజాపై విరుచుకుపడుతున్న ఇజ్రాయెల్ ఇప్పటికే ఆ ఉగ్రవాద సంస్థకు సంబంధించిన కీలక నేతలను మట్టుబెడుతూ వస్తోంది. అయితే ఇరాన్ లో గత జులైలో హమాస్ (Hamas) నేత ఇస్మాయిల్‌ హనియా (Ismail Haniyeh) హత్యకు గురైన విషయం తెలిసిందే. తాజాగా ఈ హత్యకు సంబంధించి ఇజ్రాయెల్ కీలక ప్రకటన చేసింది.

వాళ్లకు ఓ మెసేజ్ ఇవ్వాలనుకుంటున్నా

ఇస్మాయిల్ హనియాను హత్య చేసింది తామేనని ఇజ్రాయెల్‌ (Israel) తాజాగా ధ్రువీకరించింది. టెల్‌ అవీవ్‌ రక్షణ మంత్రి కాట్జ్‌ ఈ విషయాన్ని వెల్లడించారు. ఇటీవల తమపై ఎక్కువగా క్షిపణులు ప్రయోగిస్తున్న హూతీ (Houthis) ఉగ్రవాద సంస్థకు ఓ స్పష్టమైన సందేశం అందించాలనుకుంటున్నానని కాట్జ్ అన్నారు. హమాస్‌, హెజ్‌బొల్లా (Hezbollah)లను ఓడించామన్నారు. సిరియాలో బషర్‌ అల్‌ అసద్‌ పాలనను పడగొట్టామని పేర్కొన్నారు. హనియా, సిన్వర్, నస్రల్లాలను హతమార్చామని ఈ సందర్భంగా ఆయన ధ్రువీకరించారు. ఇక యెమెన్‌లోని హూతీలకు కూడా గట్టి దెబ్బ తప్పదని కాట్జ్‌ హెచ్చరించారు.

ఇరాన్ లో హమాస్ చీఫ్ హత్య

ఇరాన్ (Iran)రాజధాని టెహ్రాన్‌లోని ఆ దేశ నూతన అధ్యక్షుడి ప్రమాణ స్వీకారంలో పాల్గొనేందుకు వెళ్లిన హమాస్ చీఫ్ ఇస్మాయిల్ హనియా.. అదే నగరంలో హత్యకు గురయ్యారు. పథకం ప్రకారమే ఇజ్రాయెల్‌ ఈ దాడి చేసిందని ఇరాన్ అప్పుడే ఆరోపించినా టెల్ అవీవ్ ఆ సమయంలో ఈ విషయంపై ఎలాంటి ప్రకటన చేయలేదు. కానీ తాజాగా హనియాను చంపింది తామేనని ఇజ్రాయెల్ ధ్రువీకరించింది.