‘క’ మూవీకి అరుదైన గౌరవం.. ‘దాదా సాహెబ్‌ ఫాల్కే ఫిల్మ్‌ ఫెస్టివల్‌’కు నామినేట్

టాలీవుడ్ యంగ్ హీరో కిరణ్ అబ్బవరం (Kiran Abbavaram) జయాపజయాలతో సంబంధం లేకుండా వరుస సినిమాలు చేసుకుంటూ దూసుకెళ్తున్నాడు. ఇటీవల ఆయన నటించిన ‘క(KA)’ సినిమా సూపర్ హిట్ అయిన విషయం తెలిసిందే. 2024 దీపావళి సందర్భంగా ఈ చిత్రం విడుదలై భారీ విజయం అందుకుంది. చిన్న బడ్జెట్ తో రూపొందించిన ఈ మూవీ రూ.50 కోట్లకుపైగా వసూళ్లు సాధించింది. కిరణ్ సినీ కెరీర్​లో ఇది బిగ్గెస్ట్‌ హిట్‌గా నిలిచింది.

‘క’కు అరుదైన గౌరవం

అయితే తాజాగా క సినిమాకు మరో అరుదైన గౌరవం దక్కింది. ఓ సంస్థ నిర్వహించే ప్రతిష్ఠాత్మక ‘దాదా సాహెబ్‌ ఫాల్కే ఫిల్మ్‌ ఫెస్టివల్‌ (Dadasaheb Phalke Film Festival)’కు ‘క’ సినిమా నామినేట్‌ అయ్యింది. ఉత్తమ సినిమా విభాగంలో ఈ మూవీ నామినేట్‌ అయినట్లు తాజాగా చిత్రబృందం ప్రకటించింది. ఈ నెల ఆఖరులో ఢిల్లీ వేదికగా ఈ వేడుకలు జరగనున్నాయి. ఈ వేడుకల్లో విజేతలకు పురస్కారాలు ప్రదానం చేయనున్నారు. ఈ చిత్రబృందానికి నెట్టింట శుభాకాంక్షలు వెల్లువెత్తుతున్నాయి.

Ka has been officially selected for the 15th Dada Saheb Phalke Film Festival 2025.
A film that blends powerful storytelling with raw emotion now recognized on one of India’s most prestigious platforms!

Watch Ka exclusively on @etvwin and experience the brilliance that earned it… pic.twitter.com/5i4PNAH3e5

— ETV Win (@etvwin) April 25, 2025

మరింత ఉత్కంఠగా ‘క-2’

ఇక క సినిమా సంగతికి వస్తే ఫాంటసీ థ్రిల్లర్‌గా రూపొందిన ఈ మూవీని నూతన దర్శకులు సుజిత్, సందీప్‌ సంయుక్తంగా తెరకెక్కించారు. నయన్‌ సారిక (Nayan Saarika), తన్వీ రామ్‌ కథానాయికలుగా కనిపించారు. డాల్‌బీ విజన్‌: ఆటమ్స్‌ టెక్నాలజీలతో ఈ చిత్రాన్ని రూపొందించారు. ఇక క సినిమాకు కొనసాగింపుగా ‘క 2 (KA-2)’ ఉంటుందని ఇప్పటికే టీమ్‌ ప్రకటించిన విషయం తెలిసిందే. ‘పార్ట్‌ 1’తో పోలిస్తే.. ‘పార్ట్‌ 2’ మరింత ఉత్కంఠగా సాగేలా చూస్తామని టీమ్‌ ఇప్పటికే వెల్లడించింది.