admin
Mana Enadu : టాలీవుడ్ లో ప్రస్తుతం చోటుచేసుకున్న పరిణామాల నేపథ్యంలో మూవీ ఆర్టిస్ట్స్ అసోసియేషన్ (MAA) అధ్యక్షుడు, నటుడు మంచు విష్ణు (Manchu VIshnu) తాజాగా ఓ కీలక ప్రకటన చేశారు. సున్నితమైన విషయాలపై ఎవరూ స్పందించకపోవడం మంచిదని చెబుతూ ‘మా’ సభ్యులకు ఆయన కీలక సూచనలు చేశారు. ఇలాంటి సమయంలో మనకి సహనం, సానుభూతి, ఐక్యత అవసరం అని పేర్కొన్నారు.
‘‘ఆర్టిస్టులు ఎల్లప్పుడు అన్ని ప్రభుత్వాల ప్రజాప్రతినిధులతో మంచి సంబంధాలు కలిగి ఉంటారు. సహకారం, సృజనాత్మకతపై ఆధారపడి నడిచేది మన చిత్ర పరిశ్రమ (Tollywood). ప్రతి ప్రభుత్వంతో మన పరిశ్రమకు ఎల్లప్పుడూ సత్సంబంధాలు కొనసాగుతున్నాయి. ఇటీవల జరిగిన పరిణామాలను దృష్టిలో ఉంచుకొని, సభ్యులంతా సున్నితమైన విషయాలపై వ్యక్తిగత అభిప్రాయాలను బహిరంగంగా ప్రకటించడం, వివాదాస్పద అంశాలపై ఒకవైపు మాట్లాడటం మానుకోవాలి.
కొన్ని సమస్యలు వ్యక్తిగతమైనవి, మరికొన్ని విషాదకరమైనవి. వీటిపై చట్టం తన పని తాను చేసుకుంటూ పోతుంది. వీటిపై మాట్లాడటం వల్ల అది సమస్యలను పరిష్కరించకపోగా మరింత నష్టం చేకూరుస్తోంది. ఇలాంటి సమయంలోనే మనకు సహనం, సానుభూతి, ఐక్యత అవసరం. తెలుగు మూవీ ఆర్టిస్ట్స్ అసోసియేషన్ (Telugu Movie Artists Assoiciation) తరఫున అందరికి క్రిస్మస్, నూతన సంవత్సర శుభాకాంక్షలు. ‘మా’ ఓ పెద్ద కుటుంబం. ఏ సమస్య వచ్చినా మనమంతా కలిసికట్టుగా ఎదుర్కొందాం’’ అని మంచు విష్ణు పేర్కొన్నారు.
swarna boddula
Desk
