మీర్​పేట్ మర్డర్​ కేసు.. వెలుగులోకి షాకింగ్ విషయాలు

హైదరాబాద్ మీర్‌పేట పీఎస్‌ పరిధి జిల్లెలగూడ న్యూ వెంకటేశ్వర కాలనీలో జరిగిన హత్య కేసు(Meerpet Murder Case)లో పోలీసుల దర్యాప్తు ముమ్మరంగా సాగుతోంది. గురుమూర్తి అనే వ్యక్తి తన భార్య వెంకట మాధవిని దారుణంగా చంపి మృతదేహాన్ని ముక్కలు చేసి కుక్కర్‌లో ఉడికించి, ఎముకలను రోటిలో దంచిన విషయం తెలిసిందే. ఫొరెన్సిక్‌ బృందం ఘటనా స్థలంలో ఆధారాలు సేకరిస్తోంది.

భార్యను చంపేసి

మరోవైపు నిందితుడు గురుమూర్తిని విచారిస్తున్న పోలీసులు.. కేవలం అతడు చెప్పిన సమాచారంతోనే కాకుండా స్వీయ దర్యాప్తులో వెల్లడైన అంశాలను పరిశీలిస్తున్నారు. అయితే నిందితుడిని దర్యాప్తు చేస్తున్న సమయంలో పోలీసులకు సంచలన విషయాలు తెలిశాయి. ఈ విషయాలను తాజాగా పోలీసులు వెల్లడించారు. భార్యను చంపి ఏమీ తెలియనట్టుగా ఆమె తల్లితో కలిసి గురుమూర్తి మిస్సింగ్ కంప్లెయింట్ ఇచ్చినట్లు గుర్తించారు.

పోలీసులు ఇంకా ఏం చెప్పారంటే..

ఈనెల 16వ తేదీన ఇంట్లో పిల్లలు లేని సమయంలో గురుమూర్తి, మాధవి గొడవపడ్డారు. ఈ క్రమంలో భార్య తలపై గురుమూర్తి రెండుసార్లు గట్టిగా కొట్టగా ఆమె స్పృహతప్పి పడిపోయింది. తాను కొట్టడం వల్లే భార్య చనిపోయిందని భావించిన అతడు భయంతో ఆమె డెడ్ బాడీని ముక్కలు ముక్కలుగా కోసి కుక్కర్ లో ఉడికించాడు. ఎముకలను రోటీలో వేసి దంచాడు. చివరకు మిగిలిన వాటిని జిల్లెలగూడ చెరువులో పడేశాడు.

పట్టించిన సీసీటీవీ

అయితే 16వ తేదీన భార్యను చంపిన గురుమూర్తి 18వ తేదీన ఆమె తల్లి సుబ్బమ్మకు ఫోన్ చేసి మాధవి కనిపించడం లేదని, గొడవ పెట్టుకుని ఇంట్లో నుంచి వెళ్లిపోయిందని చెప్పాడు. పోలీసులకు ఫిర్యాదు చేద్దామంటూ మాధవి తల్లితో కలిసి 18వ తేదీన మీర్ పేట్ పీఎస్ (Meerpet Police Station) లో మిస్సింగ్ ఫిర్యాదు చేయగా కేసు నమోదు చేసుకున్నారు. ఈ క్రమంలో దర్యాప్తు చేస్తున్న పోలీసులు ఆ ప్రాంతంలోని సీసీటీవీ కెమెరాలు పరిశీలించారు.

పోలీసుల స్టైల్లో విచారించగా..

ఈ క్రమంలో మాధవి 16వ తేదీ నుంచి ఇంట్లో నుంచి బయటకు వచ్చినట్లు కనిపించలేదు. కానీ గురుమూర్తి మాత్రం పలుమార్లు ఇంట్లో నుంచి బయటకు వచ్చి వెళ్లినట్లు గుర్తించారు. దీంతో ఇంట్లోనే ఏదో జరిగి ఉంటుందని భావించి గురుమూర్తిని అదుపులోకి తీసుకుని తమ స్టైల్లో విచారించగా అతడు అసలు విషయం బయటపెట్టాడు. తానే తన భార్యను హత్య చేసినట్లు అంగీకరించినట్లు పోలీసులు తెలిపారు. మరోవైపు క్లూస్‌టీం, ఇతర ఆధారాలతో పోలీసులు దర్యాప్తు ముమ్మరం చేశారు.