రాణాను నిర్దోషిగా ప్రకటించడం భారత్​ను అవమానించడమే : ప్రధాని మోదీ

ముంబయి 26/11 ఉగ్రదాడి కేసులో (Mumbai 26/11) సూత్రధారి తహవూర్‌ హుస్సేన్‌ రాణాను ఎట్టకేలకు భారత్‌కు తీసుకొచ్చిన విషయం తెలిసిందే.  ప్రస్తుతం అతడు ఎన్‌ఐఏ కస్టడీలో ఉన్నాడు. అయితే రాణాను బిర్యానీ పెట్టి మేపొద్దని.. ప్రత్యేక సౌకర్యాలు కల్పించొద్దని.. వీలైనంత త్వరగా ఉరి తీయాలని యావత్ భారతావణి డిమాండ్ చేస్తోంది. ఈ నేపథ్యంలో రాణా గురించి గతంలో ప్రధానంత్రి నరేంద్ర మోదీ చేసిన ట్వీట్ ప్రస్తుతం సోషల్​ మీడియాలో వైరల్​ అవుతోంది.

US declaring Tahawwur Rana innocent in Mumbai attack has disgraced the sovereignty of India & it is a “major foreign policy setback”

— Narendra Modi (@narendramodi) June 10, 2011

రాణాపై మోదీ ట్వీట్

2011లో ఈ కేసుకు సంబంధించి ముంబయి ఉగ్రదాడుల్లో రాణా (Thawwur Rana) ప్రత్యక్ష పాత్ర లేదని స్పష్టం చేస్తూ అమెరికా కోర్టు కీలక తీర్పు ఇచ్చింది.  ఆ దాడులకు కారణమైన ఉగ్ర సంస్థకు మద్దుతు ఇచ్చినందుకు రాణాను దోషిగా తేల్చింది. ఆ తీర్పుపై స్పందిస్తూ 2011 జూన్​ 10వ తేదీన అప్పటి కాంగ్రెస్ ప్రభుత్వ దౌత్య విధానాలను తీవ్రంగా విమర్శిస్తూ  గుజరాత్ సీఎం హోదాలో ఉన్న నరేంద్ర మోదీ (Narendra Modi) నెట్టింట ఓ పోస్టు పెట్టారు.

శెభాష్ మోదీ జీ

‘ముంబయి ఉగ్రదాడిలో తహవ్వుర్‌ రాణాను నిర్దోషిగా యూఎస్‌ ప్రకటించడం భారత సార్వభౌమత్వాన్ని అవమానించడమే. ఇది విదేశాంగ విధానానికి భారీ ఎదురుదెబ్బ.’ అంటూ మోదీ తన పోస్టులో పేర్కొన్నారు. ఇక ప్రస్తుతం రాణాను భారత్​ తీసుకొచ్చిన నేపథ్యంలో నెటిజన్లు అప్పటి పోస్టును బయటకు తీశారు. ఈ పోస్టును షేర్ చేస్తూ ప్రధాని మోదీ దౌత్య విధానాలను ప్రశంసిస్తున్నారు.