admin
హైదరాబాద్ మీర్ పేట పోలీస్ స్టేషన్ పరిధిలో న్యూ వెంకటేశ్వరనగర్‌ కాలనీలో బుధవారం రోజున జరిగిన హత్య కేసు (Meerpet Murder Case)లో పోలీసులు దర్యాప్తు ముమ్మరం చేశారు. భార్యను చంపి భయంతో ముక్కలు ముక్కలుగా కోసి కుక్కర్ లో ఉడకబెట్టి, రోటిలో దంచి మిగతా ముక్కలను చెరువులో పడేశాడు భర్త గురుమూర్తి. ఈ కేసులో పోలీసుల దర్యాప్తులో తానే చంపినట్లు అంగకీరించాడు. అయితే భార్య శరీరాన్ని ముక్కలుగా చేయడానికి ముందు ప్రాక్టీస్ కోసం కుక్కను చంపాడని పోలీసుల విచారణలో తేలింది.
కాలనీ అంతా ఖాళీ
ఇక గురుమూర్తి తన భార్యను చంపడంతో అక్కడి కాలనీవాసులు భయాందోళనకు గురయ్యారు. ముఖ్యంగా అదే బిల్డింగులో ఉన్న వారంతా ఉన్నఫలంగా తాళాలు వేసి వేరే చోటుకు వెళ్లిపోయారు. ఇక అదే కాలనీలో ఉన్న వారు కూడా చాలా వరకు తమ ఇండ్లకు తాళాలు వేసి బంధువులు, స్నేహితుల ఇళ్లకు వెళ్లినట్లు తెలిసింది. ప్రస్తుతం ఆ కాలనీ అంతా నిర్మానుష్యంగా మారింది. ఇక గురుమూర్తి నివాసముండే భవనం మాత్రం పోలీసుల నిఘాలో ఉంది.
హత్య చేశానని చెప్పినా ఆధారాల్లేవ్
మరోవైపు పోలీసుల విచారణలో గురుమూర్తి పొంతనలేని సమాధానాలు చెబుతున్నట్లు తెలిసింది. తానే చంపినట్లు ఒప్పుకున్నా.. దానికి ఆధారాలు మాత్రం లేకపోవడంతో ఏం చేయాలో అర్థంగాక తలలు పట్టుకుంటున్నారు. ఇక గురుమూర్తి తన భార్యను చంపి, మృతదేహం మాయం చేయడానికి ఉపయోగించిన కుక్కర్, కత్తులు, హీటర్, బకెట్ అన్ని వస్తువులను ఫోరెన్సిక్ టీమ్ స్వాధీనం చేసుకుంది.
Desk
swarna boddula
