స్పిరిట్‌ షూటింగ్‌ అప్డేట్‌: ప్రభాస్‌ ఎప్పుడు సెట్స్‌లోకి అడుగుపెడతారంటే..?

పాన్‌ ఇండియా రెబల్ స్టార్‌ ప్రభాస్‌(Prabhas) క్రేజ్‌ గురించి ప్రత్యేకంగా చెప్పాల్సిన అవసరం లేదు. ఆయన నటించే ప్రతి సినిమా కోసం ఫ్యాన్స్‌ ఎంతో ఆసక్తిగా ఎదురుచూస్తారు. ‘బాహుబలి’తో ప్రపంచవ్యాప్తంగా స్టార్‌డమ్‌ను అందుకున్న ప్రభాస్‌ ప్రస్తుతం వరుస ప్రాజెక్ట్‌లతో బిజీగా ఉన్నారు. ప్రస్తుతం డైరెక్టర్‌ మారుతి(Maruthi) దర్శకత్వంలో రాజాసాబ్ చిత్రంలో నటిస్తుండగా, హను రాఘవపూడి(Hanu Raghavapudi) దర్శకత్వంలో తెరకెక్కుతున్న ఫౌజీ(Fauji) (వర్కింగ్ టైటిల్‌)లో కూడా నటిస్తున్నారు. ఈ రెండు సినిమాలపై ఇప్పటికే భారీ అంచనాలు నెలకొన్నాయి.

ఇవే కాకుండా, అభిమానులు అత్యంత ఆసక్తిగా ఎదురుచూస్తున్న మరో ప్రాజెక్ట్‌ స్పిరిట్. ‘యానిమల్‌’తో సంచలనం సృష్టించిన సందీప్‌ రెడ్డి వంగా(Sandeep Reddy Vanga) ఈ సినిమాను తెరకెక్కిస్తున్నారు. ఈ కాంబినేషన్‌పై భారీ హైప్‌ నెలకొంది. తాజా సమాచారం ప్రకారం, ఈ చిత్రం సెప్టెంబర్‌(September) నెలాఖరున పూజా కార్యక్రమాలతో సెట్స్‌పైకి వెళ్లనుంది. ఇందులో ప్రభాస్‌ సరసన బాలీవుడ్‌ బ్యూటీ త్రిప్తి దిమ్రి నటించనున్నారు. భూషణ్‌ కుమార్‌, క్రిషన్‌ కుమార్‌ సంయుక్తంగా ఈ చిత్రాన్ని నిర్మిస్తున్నారు.

ఇంకా స్పిరిట్ తొలి షెడ్యూల్‌ విదేశాల్లో జరగనుంది. ప్రస్తుతం సందీప్‌ రెడ్డి వంగా ప్రీ-ప్రొడక్షన్‌ పనుల్లో బిజీగా ఉన్నారు. మెక్సికో, ఇండోనేషియా వంటి లొకేషన్లు పరిశీలించినట్లు టాక్‌ వినిపిస్తోంది. అయితే, రాజాసాబ్, ఫౌజీ చిత్రాల షూటింగ్‌ పూర్తయ్యాకే ప్రభాస్‌ స్పిరిట్ సెట్స్‌లో అడుగుపెడతారు. ఈ సినిమాను వచ్చే ఏడాది ప్రేక్షకుల ముందుకు తీసుకురావడానికి మేకర్స్‌ ప్లాన్‌ చేస్తున్నారు.