ఎమ్మెల్యే అభ్య‌ర్థుల పోటీలో…యూట్యూబ్ స్టార్స్ కూడా..

మ‌న తెలంగాణః ఈసారి తెలంగాణ ఎన్నికలు ఆస‌క్తిగా మారాయి. రాజకీయ పార్టీల అభ్యర్థులతో పాటు.. సోషల్ మీడియా ద్వారా ఫేమస్ అయిన కొంత మంది సెలెబ్రెటీలు కూడా పోటీ చేస్తున్నారు. అందులో గుంటి నాగరాజు కూడా ఒకరు. తాను ఓవైపు వ్యవసాయం చేసుకుంటూనే.. మరోవైపు సోషల్ మీడియాలో వీడియోలతో ఫేమస్ అయ్యారు. ఇప్పుడు స్వతంత్ర అభ్యర్థిగా ఖమ్మంలో పోటీ చేస్తున్నారు. ఆయన గురించి కొన్ని ఆసక్తికర విషయాలు.
తెలంగాణ అసెంబ్లీ ఎన్నికల్లో ఆసక్తికర ఘటనలు చోటుచేసుకున్నాయి. అయితే.. ఈ ఎన్నికలు మునుపటి లెక్క కాదు.. ఈసారి కేవలం ప్రధాన రాజకీయ పార్టీల నుంచే కాకుండా.. చాలా మంది స్వతంత్ర అభ్యర్థులు కూడా బరిలో దిగుతున్నారు. అందులోనూ.. సోషల్ మీడియా ద్వారా ఫేమస్ అయిన వాళ్లు కూడా ఎన్నికల రంగంలో దిగి.. మహామహులకు సవాల్ విసురుతున్నారు. అయితే.. ఇప్పటికే నిరుద్యోగుల తరపున బర్రెలక్క అలియాస్ శిరీష రంగంలోకి దిగగా.. యువత నుంచి విశేష స్పందన లభిస్తోంది. అయితే.. అలా సోషల్ మీడియా ద్వారా ఫేమస్ అయిన ఇంకో సెలెబ్రిటీ గుంటి నాగరాజు కూడా.. ఎన్నికల బరిలో దిగాడు.
ఖమ్మం నియోజకవర్గంలోని రఘునాథపాలెం మండలం కోయచెలక గ్రామానికి చెందిన గుంటి నాగరాజు.. స్వతంత్ర అభ్యర్థిగా పోటీ చేస్తున్నారు. గుంటి నాగరాజుకు ఎన్నికల అధికారులు విజిల్ గుర్తు కేటాయించగా.. తాను వెరైటీగా ప్రచారం నిర్వహిస్తున్నాడు. తన ద్విచక్రవాహనానికే ఫ్లెక్సీలు ఏర్పాటు చేసుకుని.. మైక్ ద్వారా గ్రామ గ్రామాలు తిరుగుతూ ప్రాచరం చేస్తూ.. అందరి దృష్టిని ఆకర్షిస్తున్నాడు.
డిగ్రీ చదివిన గుంటి నాగరాజు.. తన తల్లిదండ్రులతో కలిసి వ్యయసాయం చేస్తున్నాడు. అయితే.. తాను చదివిన చదువుకు ఉద్యోగం రాకపోవటంతో.. వ్యవసాయంలోనే స్థిరపడినట్టు చెప్పుకొచ్చారు. తాను చేసే వ్యవసాయ పనులను వీడియో తీసి టిక్ టాక్‌లో పెట్టగా.. అనుకోకుండానే ఫేమస్ అయ్యానని చెప్పుకొచ్చాడు. అప్పటి నుంచి జనాలు తనను గుర్తుపట్టటం మొదలుపెట్టడంతో.. ఇక తాన ట్యాలెంట్‌కు పదును పెడుతూ యూట్యూబ్‌లో ఇన్‌స్టాగ్రాంలో వీడియోలు పెడుతున్నానని తెలిపారు. యూట్యూబ్, ఇన్‌స్టాగ్రాం ద్వారా నెలకు 30 నుంచి 40 వేల వరకు రెవెన్యూ వస్తోందని గుంటి నాగరాజు చెప్పుకొచ్చారు.

అయితే.. తనకు కేవలం రెండెకరాల పొలం మాత్రమే ఉందని నాగరాజు చెప్పారు. గతంలో 20 ఎకరాలు కౌలుకు తీసుకుని వ్యవసాయం చేశామని… కానీ లాభాలు రాకపోవటంతో తన రెండెకరాలతో పాటు మరో ఎకరం కౌలుకు తీసుకుని సాగు చేస్తున్నట్టు తెలిపారు గుంటి నాగరాజు. చనిపోయాక కూడా బతికుండాలన్న లక్ష్యంతోనే.. ఈ వీడియోల బాట పట్టానని తెలిపారు. ఈ క్రమంలోనే.. ఎన్నికల్లో పోటీ చేయాలని నిర్ణయించుకున్నానని వివరించారు.