admin
లక్షలాది మంది అభ్యర్థులు ఉత్కంఠగా ఎదురుచూస్తోన్న TGPSC Group-1, 2, 3 ఫలితాల విడుదలకు తేదీలు ఖరాయ్యాయి. తాజాగా జరిగిన తెలంగాణ పబ్లిక్ సర్వీస్ కమిషన్ (TGPSC) సమావేశంలో పలు కీలక నిర్ణయాలు తీసుకున్నారు. పెండింగ్లో ఉన్న అనేక నోటిఫికేషన్ల స్థితిని సమీక్షించడంతో పాటు ఇప్పటికే నిర్వహించిన పలు పరీక్షల జనరల్ ర్యాంకింగ్ /రిజల్ట్స్కు సంబంధించిన షెడ్యూల్ను విడుదల చేశారు.
ఈ పోస్టుల ఫలితాల తేదీలూ ఫిక్స్
గ్రూప్-1 ఉద్యోగ నియామక పరీక్షలో అభ్యర్థులు సాధించిన ప్రొవిజినల్ మార్కుల వివరాలను ఇవాళ (మార్చి 10) ప్రకటించనున్నారు. అలాగే, గ్రూప్-2 అభ్యర్థుల జనరల్ ర్యాంకింగ్ జాబితా మార్చి 11న, గ్రూప్- 3 పరీక్ష జనరల్ ర్యాంకింగ్ జాబితాను మార్చి 14న విడుదల చేస్తారు. వీటితో పాటుగా హాస్టల్ వెల్ఫేర్ ఆఫీసర్ పోస్టులకు నిర్వహించిన పరీక్షల తుది ఫలితాలను మార్చి 17న, ఎక్స్టెన్షన్ ఆఫీసర్ ఉద్యోగ పరీక్షల తుది ఫలితాలను మార్చి 19న ప్రకటించనున్నారు. రాష్ట్రంలో 563 గ్రూప్-1 ఉద్యోగాలు, 783 గ్రూప్-2, 1,365 గ్రూప్-3 పోస్టులతో పాటు 581 వెల్ఫేర్ ఆఫీసర్ ఉద్యోగాలకు గతంలో పరీక్షలు నిర్వహించిన విషయం తెలిసిందే.
తప్పుడు సమాచారంపై జాగ్రత్త
గ్రూప్-1 ఉద్యోగ నియామకాలపై ఎలాంటి తప్పుడు సమాచారాన్ని నమ్మొద్దని TGPSC ఇటీవల విజ్ఞప్తి చేసింది. ప్రభుత్వ ఉద్యోగాలు కల్పిస్తామని, సమాచారాన్ని పొందడంలో సహాయం చేస్తామని సంప్రదిస్తే పోలీసు కంప్లయింట్తో కలిపి కమిషన్కు ఫిర్యాదు చేసేలా మొబైల్ నంబర్ (99667-00339), ఈ మెయిల్ ఐడీ (vigilance@tspsc.gov.in) ద్వారా ఫిర్యాదు చేయాలని సూచించింది.
Desk
swarna boddula
