ఇది రిపీట్ కావొద్దు.. కంచ గచ్చిబౌలి భూముల వ్యవహారంపై సీఎం రేవంత్‌

రంగారెడ్డి జిల్లా శేర్లింగంపల్లిలోని కంచ గచ్చబౌలి భూముల వివాదం (Kancha Gachibowli Lands Dispute) రాష్ట్రంలో దుమారం రేపిన విషయం తెలిసిందే. ఈ భూములు ప్రభుత్వానికే చెందుతాయని టీజీఐఐసీ ఇటీవల ప్రకటన విడుదల చేయడం చర్చనీయాంశమైంది. ప్రతిపక్షాలు, హైదరాబాద్ సెంట్రల్ యూనివర్సిటీ (HCU) విద్యార్థులు ఈ వ్యవహారంలో రాష్ట్ర ప్రభుత్వం తీరుపై నిరసన గళమెత్తారు. ఈ వివాదం కాస్త తెలంగాణ హైకోర్టు, సుప్రీంకోర్టుకు చేరింది. వివాదాస్పదమైన కంచ గచ్చిబౌలి భూముల కేసులపై తాజాగా ముఖ్యమంత్రి రేవంత్‌ రెడ్డి సమీక్ష నిర్వహించారు.

అవన్నీ తప్పుడు వీడియోలు

ప్రభుత్వం తదుపరి కార్యాచరణపై అధికారులకు సీఎం రేవంత్ (CM Revanth Reddy) కీలక మార్గదర్శకాలు జారీ చేశారు.  చెట్లను నరికివేయడంతో అక్కడి వన్యప్రాణులు చెల్లాచెదురయ్యాయని కొందరు వీడియోలు వైరల్ చేసిన విషయం తెలిసిందే. అయితే ఈ వీడియోలు ఏఐ సాయంతో సృష్టించిన తప్పుడు వీడియోలను.. ఇందులో ఎలాంటి వాస్తవం లేదని ముఖ్యమంత్రి రేవంత్ రెడ్డి తెలిపారు. దీనిపై విచారణకు ఆదేశించేలా కోర్టును కోరాలని అధికారులకు దిశానిర్దేశం చేశారు.

ఇది రిపీట్ కావొద్దు

కంచ గచ్చిబౌలి భూముల్లో 25 ఏళ్లలో ఎన్నో ప్రాజెక్టులు నిర్మించారని అధికారులు సీఎం దృష్టికి తీసుకెళ్లారు. ఎన్నడూ వన్యప్రాణులు, పర్యావరణానికి సంబంధించిన వివాదాలు రాలేదని తెలిపారు.  కొందరు ఏఐ ఫేక్‌ వీడియోల (HCU AI Fake Videos)తో గందరగోళం సృష్టించారని ముఖ్యమంత్రికి అధికారులు వివరించడంతో.. ఇలాంటి ఘటనలు పునరావృతం కాకుండా చూడాలని సీఎం ఆదేశించారు. రాష్ట్రంలో సైబర్‌ క్రైమ్‌ విభాగాన్ని బలోపేతం చేసి ఏఐ ఫేక్‌ కంటెంట్‌ను పసిగట్టే ఫొరెన్సిక్‌, హార్డ్‌వేర్‌, సాఫ్ట్‌వేర్‌ టూల్స్‌ను సమకూర్చుకోవాలని అధికారులకు సూచించారు.