admin
హైదరాబాద్ సెంట్రల్‌ యూనివర్సిటీ (HCU) వ్యవహారం తెలంగాణలో తీవ్ర దుమారం రేపుతోంది. ఈ వ్యవహారంపై కాంగ్రెస్ ప్రభుత్వం, సీఎం రేవంత్‌రెడ్డి వ్యవహరిస్తున్న తీరుపై బీఆర్ఎస్ వర్కింగ్‌ ప్రెసిడెంట్ కేటీఆర్ (KTR) మరోసారి విరుచుకుపడ్డారు. మరో మూడేళ్లలో రాష్ట్రంలో బీఆర్ఎస్ పార్టీ అధికారంలోకి వస్తుందని కేటీఆర్ అన్నారు. అప్పుడు ఆ భూముల్లో ఎకో పార్కు ఏర్పాటు చేస్తామని.. ఇప్పుడు ఆ భూములను ఎవరైనా కొనుగోలు చేస్తే తాము అధికారంలోకి వస్తే తిరిగి ఇవ్వమని స్పష్టం చేశారు. ఈ సందర్భంగా బీఆర్ఎస్ నేతలతో కలిసి తెలంగాణ భవన్‌లో ఆయన మీడియా సమావేశం నిర్వహించారు.
ఇది ఆస్తి తగాదా కాదు
హైదరాబాద్ సెంట్రల్‌ యూనివర్సిటీలో విద్యార్థులు చేస్తున్న ఆందోళనపై కేటీఆర్ (KTR on HCU Land) స్పందించారు. పోరాట స్ఫూర్తికి బీఆర్ఎస్ పార్టీ తరఫున, హైదరాబాద్ నగర ప్రజల తరఫున సెల్యూట్‌ చేశారు. ఈ భూములు దాయాదుల పోరు కాదని.. ఆస్తి తగాదా అంతకంటే కాదని అన్నారు. ముఖ్యమంత్రి అనే వాడు ఈ రాష్ట్రానికి బాసో.. నియంతనో.. చక్రవర్తో, రాజో కాదని.. ఒక పెద్ద పాలేరులా, పెద్ద సర్వెంట్‌ మాదిరిగా పని చేయాల్సిన బాధ్యతలు ఉన్న వ్యక్తి అని వ్యాఖ్యానించారు. మంత్రి అయినా, ఎమ్మెల్యే, ఎమ్మెల్సీ అయినా ప్రజా సేవకులం అని.. ఈ విషయం మరిచిపోయి రాజ్యాంగబద్ధమైన పదవిలో ఉన్నానని రేవంత్ రెడ్డి ఇంగితం కోల్పోయి ప్రవర్తిస్తున్నారని మండిపడ్డారు.
ఇష్టమొచ్చినొట్లు చేస్తే ఊరుకోం
‘మీరు ప్రజలు ఎన్నుకున్న నేత మాత్రమే. మా ఎమ్మెల్యేలు మీ కాంగ్రెస్ పార్టీలో మెజారిటీ మంది ఎన్నుకుంటే.. ముఖ్యమంత్రి (CM Revanth Reddy) అయ్యారు. రాజు కారు.. నియంత కారు. పేరుకేమో ప్రజాపాలన. ప్రజా పాలన అనే అర్థానికి పాతరేసి బుల్డోజర్లు, జేసీబీలతో.. మేం పాలకులం.. మీరంతా కాలికింద చెప్పుల్లా ఉండాలనే విధంగా.. బానిసలు ఉన్నట్లుగా ఇక విచిత్రమైన మానసిక రోగంతో బాధపడుతున్నట్లుగా రేవంత్ రెడ్డి ప్రభుత్వ వ్యవహారం ఉంది. గవర్నర్ కస్టోడియన్‌ మాత్రమే. ప్రజలు మాత్రమే ఓనర్లు. ప్రజల సొమ్ముకు నువ్వు ధర్మకర్తవు మాత్రమే. నేను రాజును.. ఇది నా రాజ్యం అన్నట్లుగా వ్యవహరించొద్దు. అది యూనివర్సిటీ భూమా? గవర్నమెంట్‌ భూమా అనే పంచాయితీని పక్కనపెడితే.. మీరు కేవలం తాత్కాలిక ధర్మకర్త మాత్రమే. దాన్ని కాపాడాల్సింది పోయి.. ఇష్టం వచ్చినట్లు వ్యవహారం చేస్తానంటే కుదరదు’ అంటూ కేటీఆర్ ఘాటుగా స్పందించారు.
Desk
swarna boddula
