Dhoom 4 : బాలీవుడ్ సూపర్ హిట్ ఫ్రాంఛైజీలో విలన్‌గా సూర్య?

ManaEnadu:బాలీవుడ్‌లో తెరకెక్కిన సూపర్ హిట్ ఫ్రాంఛైజీలో కచ్చితంగా ‘ధూమ్‌’ (Dhoom) సిరీస్ ఉంటుంది. ఈ ఫ్రాంఛైజీకి హిందీలోనే కాదు యావత్ ఇండియాలో ఫ్యాన్స్ ఉన్నారు. భారతీయ యాక్షన్‌ ఫిల్మ్స్‌లో ధూమ్ సిరీస్​కు ఉన్న క్రేజే వేరు. చిన్న పిల్లల నుంచి పెద్దల వరకు ఈ సిరీస్​ను ఇష్టపడుతుంటారు. ఇప్పటికే ఈ ఫ్రాంఛైజీలో మూడు సినిమాలు వచ్చాయి.

2004లో ధూమ్​, ఆ తర్వాత ధూమ్-2, ధూమ్-3 (Dhoom 3) ప్రేక్షకులను అలరించాయి. బాక్సాఫీస్‌ వద్ద అవన్నీ సూపర్‌ హిట్స్‌ అందుకున్నాయి. ఈ ఫ్రాంఛైజీలోనే త్వరలో ‘ధూమ్‌ 4’ పట్టాలెక్కనున్నట్లు సమాచారం. ఈ ఫ్రాంఛైజీ ప్రొడక్షన్ కంపెనీ యశ్‌ రాజ్‌ ఫిల్మ్స్ (Yash Raj Films) ఇందుకోసం సన్నాహాలు చేస్తున్నట్లు తెలిసింది. ఈ విషయం తెలిసి ఫ్యాన్స్ తెగ ఖుష్ అవుతున్నారు.

ఇక ‘ధూమ్‌, పార్ట్‌ 2, 3’లకు కథను అందించిన ఆదిత్య చోప్రానే ‘ధూమ్‌ 4 (Dhoom 4)’కు కూడా కథ అందించనున్నట్లు తెలిసింది. ప్రస్తుతం సినిమాల్లో టెక్నాలజీ బాగా పెరిగిపోయింది. మరోవైపు సాదాసీదా యాక్షన్ ఫిల్మ్స్​ను ప్రేక్షకులు రుచించరు. అందుకే ప్రస్తుతం ఉన్న ట్రెండ్‌కు దక్కట్టుగా ఈ సినిమాను గ్రాండ్​గా రూపొందించేందుకు ప్రయత్నిస్తున్నారట ఆదిత్య చోప్రా (Adithya Chopra).

అయితే ధూమ్-4కు సంబంధించి ఓ క్రేజీ న్యూస్ ఇప్పుడు నెట్టింట వైరల్ అవుతోంది. ఈ సీక్వెల్​లో కోలీవుడ్‌ స్టార్ హీరో సూర్య (Suriya) కీలక పాత్రలో నటించనున్నాడట. ఈ సినిమాలో ముఖ్యమైన విలన్ రోల్​లో నటించనున్నట్లు టాక్. ఇప్పటికే మేకర్స్ సూర్యను ఈ విషయమైన సంప్రదించగా ఆయన సానుకూలంగా స్పందించారట.

ఇక ఈ విషయం తెలుసుకున్న సూర్య ఫ్యాన్స్ భలే ఆనంద పడుతున్నారు. ఈ సీక్వెల్​లో యాక్ట్‌ చేస్తే ఈ సినిమా రేంజ్ ఎక్కడికో వెళ్తుందని అంటున్నారు. నెగటివ్‌ షేడ్స్ ఉన్న పాత్రల్లో యాక్ట్‌ చేయడం సూర్యకు కొత్త ఏమీ కాదు. ‘24’, ‘విక్రమ్‌’ సినిమాల్లో విలన్​గా నటించి మెప్పించారు. ముఖ్యంగా కమల్ హాసన్ లీడ్ రోల్​లో వచ్చిన ‘విక్రమ్‌’ మూవీ రోలెక్స్‌ (Rolex) పాత్రలో సూర్య అదరగొట్టాడు.