adminMana Enadu : ఫిలిమ్ నగర్ కల్చరల్ సెంటర్ ఇవ్వాళ దేశంలోనే ఇంత ప్రతిష్టాత్మకంగా ఉందంటే అందుకు ఆద్యులు నందమూరి తారక రామారావు (NTR) అని ఎఫ్ఎన్సీసీ అధ్యక్షుడు కేఎస్. రామారావు తెలిపారు. 2024 – 25 సంవత్సరానికి గానూ ఎఫ్ఎన్సీసీ అధ్యక్షుడిగా ఎన్నికైన కేఎస్ రామారావు (KS Ramarao)ను ఇవాళ ఎన్టీఆర్ శత జయంతి కమిటీ సత్కరించింది.
ఈ సందర్భంగా కె. ఎస్. రామారావు మాట్లాడుతూ.. 1995లో ఎన్. టి. రామారావు ముఖ్యమంత్రిగా ఉన్నప్పుడు డి. వి. ఎస్. రాజు ద్వారా మద్రాస్ లో స్థిరపడిన తమను ఆహ్వానించారని తెలిపారు. మద్రాసు నుంచి తమను హైదరాబాద్ కు తరలి రమ్మన్నారని గుర్తు చేసుకున్నారు. అప్పుడు ఫిలిమ్ నగర్ లో తామందరికీ ఓకే సమావేశ మందిరం కావాలని అడిగ్గా.. ఆయన వెంటనే ఫిలిమ్ నగర్ లో స్థలం చూసుకోమని చెప్పారని వెల్లడించారు.
తాము ఇప్పుడున్న కొండను ఎంపిక చేసుకొని చెప్పామమని.. అప్పుడు ఎన్టీఆర్ వెంటనే అధికారులను పిలిపించి ఫైల్ సిద్ధం చెయ్యమన్నారని కేఎస్ రామారావు గుర్తు చేసుకున్నారు. అయితే ఆ తరువాత జరిగిన రాజకీయ పరిణామాలతో చంద్ర బాబు నాయుడు (Chandrababu Naidu) ముఖ్యమంత్రి అయ్యారని.. ఎన్టీఆర్ స్థలం ఇస్తామని చెప్పిన సంగతి బాబుతో చెప్పగానే మరో మాట లేకుండా ఈ స్థలాన్ని కల్చరల్ సెంటర్ కు కేటాయించారని తెలిపారు. చంద్రబాబు ఈ సెంటర్ కు శంకుస్థాపన చేసి ప్రారంభించారని వెల్లడించారు.
అనంతరం ఎన్టీఆర్ సెంటినరీ కమిటీ ఛైర్మన్ టీడీ జనార్దన్ మాట్లాడుతూ.. ‘తెలుగు సినిమా రంగంలో కె. ఎస్. రామారావు అంటే ఒక బ్రాండ్. ఆయన హయాంలో ఫిలిమ్ నగర్ కల్చరల్ సెంటర్ బహుముఖాలుగా అభివృద్ధి చెందాలని ఆశిస్తున్నాను’. అని అన్నారు.
ఇక ఎన్టీఆర్ హీరోగా నటించిన ‘విచిత్ర కుటుంబం’ సినిమా ద్వారా 1969లో అసిస్టెంట్ దర్శకుడుగా కె. ఎస్. రామారావు సినిమా రంగంలోకి ఎంట్రీ ఇచ్చారు. ఈ సమావేశంలో ఎన్. టి. ఆర్. కమిటీ సభ్యులు, రవి శంకర్, మధుసూదన రాజు, రాంబాబు పర్వతనేని, శ్రీపతి సతీష్ పాల్గొన్నారు.
Desk
swarna boddula
