Desk
చైనాలో ప్రకంపనలు సృష్టిస్తున్న హెచ్‌ఎంపీవీ (HMPV) వైరస్.. భారత్లోనూ కలకలం రేపుతోంది. భారత్లో HMPV కేసుల సంఖ్య మూడుకు చేరాయి. కర్ణాటకలో రెండు కేసులు నమోదైన విషయం తెలిసిందే. తాజగా గుజరాత్‌లోనూ ఒక కేసును గుర్తించినట్లు ఐసీఎంఆర్ (CIMR) వెల్లడించింది. బెంగళూరులో 3, 8 నెలల వయసున్న ఇద్దరు చిన్నారులు, అహ్మదాబాద్‌లో ఓ చిన్నారికి ఈ వైరస్ సోకినట్లు నిర్ధారించింది. ‘దేశవ్యాప్తంగా శ్వాసకోశ వ్యాధుల విషయంలో ఐసీఎంఆర్ సాధారణ పర్యవేక్షణలో భాగంగా ఈ రెండు కేసులు వెలుగు చూశాయి’ అని కేంద్ర ఆరోగ్యశాఖ వెల్లడించింది. భారత్‌తో సహా ప్రపంచవ్యాప్తంగా పలు దేశాల్లో ఈ వైరస్ వ్యాప్తిలో ఉందని, దానికి సంబంధించిన కేసులు నమోదయ్యాయని తెలిపింది. గుజరాత్లో నమోదైన కేసుతో అక్కడి వైద్యారోగ్య శాఖ అప్రమత్తమైంది. కేసులను నిర్ధారించేందుకు మరిన్ని పరీక్షలు చేసేందుకు ప్రణాళికలు సిద్ధం చేస్తున్నట్లు ఓ అధికారి తెలిపారు.
మూడు నెలల చిన్నారి డిశ్చార్జ్
బెంగళూరులో 3 నెలల చిన్నారి వైరస్ నుంచి కోలుకొని హాస్పిటల్ నుంచి డిశ్చార్జ్ కాగా.. మరో చిన్నారికి ట్రీట్మెంట్ అందిస్తున్నారు. గుజరాత్‌లోని అహ్మదాబాద్‌లో వైరస్ సోకిన రెండు నెలల చిన్నారి కూడా చికిత్స పొందుతోంది. అయితే వైరస్ వెలుగు చూసిన దేశాల్లో వీరి కుటుంబాలు ఎలాంటి ప్రయాణాలు చేయలేదని తెలిపింది.
వారికి సోకే అవకాశం
హెచ్‌ఎంపీవీ వైరస్ లక్షణాలు (HMPV virus Symptoms) ఫ్లూ, ఇతర శ్వాసకోశ ఇన్ఫెక్షన్ల మాదిరిగానే ఉంటాయని వైద్య నిపుణులు వెల్లడించారు. దగ్గు, జ్వరం, ముక్కు దిబ్బడగా అనిపించడం, శ్వాస తీసుకోవడంలో ఇబ్బంది వంటివి కనిపిస్తాయి. అమెరికాకు చెందిన సెంటర్స్ ఫర్ డిసీజ్‌ కంట్రోల్‌ అండ్ ప్రివెన్షన్ (CDC) ప్రకారం.. చిన్నారులు, వృద్ధులు, బలహీనమైన రోగనిరోధక శక్తి కలిగిన వ్యక్తులు దీనిబారినపడే అవకాశాలు ఎక్కువ.
swarna boddula
admin
