‘దసరా’ బాక్సాఫీస్ ఫైట్.. ఆ 5 సినిమాలపైనే స్పెషల్ ఫోకస్

ManaEnadu:టాలీవుడ్​ బాక్సాఫీస్​ వద్ద సంక్రాంతి, సమ్మర్, దసరా సీజన్లు అదరగొడతాయి. ఈ సీజన్లలో పెద్దపెద్ద సినిమాలు రిలీజ్ అయి సూపర్ హిట్ కొడతాయి. ఇక ఈ ఏడాది సంక్రాంతి బాక్సాఫీస్​ బద్ధలైన విషయం తెలిసిందే. ఇక ఇప్పుడు దసరా వంతు వచ్చింది. ఈ సంవత్సరం దసరా పండుగకు బాక్సాఫీస్​ను షేక్ ఆడించడానికి సినిమాలు రెడీ అయ్యాయి. నాలుగు తెలుగు సినిమాలు, ఒక తమిళ్ మూవీ ఈ లిస్టులో ఉంది. అయితే ఈ నాలుగు తెలుగు సినిమాల్లో ఒక్కటి కూడా స్టార్ హీరోలు, సీనియర్ నటులది లేకపోవడం గమనార్హం. మరి ఆ సినిమాలేంటో చూద్దామా?

స్వాగ్​తో శ్రీవిష్ణు

టాలీవుడ్ యంగ్ హీరో శ్రీ విష్ణు గురించి తెలిసిందే. సినిమాలు ఎంచుకోవడంలో ఈయన రూటే సపరేటు. కామెడీ, ఎమోషన్​ను ఈ హీరో తెరపై అద్భుతంగా ఆవిష్కరిస్తాడు. శ్రీవిష్ణు(Sri Vishnu) చిత్రం అంటే మినిమమ్ ఎంటర్​టైన్​మెంట్ గ్యారంటీ. అలా ఈ ఏడాది దసరా పండుగకు ఈ యంగ్ హీరో ‘స్వాగ్ (Swag Movie)’ చిత్రంతో అక్టోబరు 4న థియేటర్లలోకి వస్తున్నాడు. ‘సామజవరగమన’, ‘ఓం భీం బుష్‌’ సూపర్ హిట్స్ తర్వాత స్వాగ్​తో హ్యాట్రిక్​కు ట్రై చేస్తున్నాడు. రాజ రాజ చోర ఫేం డైరెక్టర్ హసిత్‌ గోలి ఈ సినిమాను తెరకెక్కిస్తున్నాడు. రీతూ వర్మ హీరోయిన్​గా నటిస్తోంది.

గోపీచంద్- శ్రీనువైట్ల మూవీ

చాలా కాలం నుంచి నటుడు గోపీచంద్ (Gopichand)​కు సరైన హిట్ పడలేదు. వరుస పెట్టి సినిమాలు చేస్తున్నా ఈయనకు పెద్దగా కలిసి రావడం లేదు. ఇక తాజాగా దర్శకుడు శ్రీను వైట్ల తెరకెక్కిస్తున్న ‘విశ్వం( Viswam Movie)’ సినిమాతో గోపీచంద్ రాబోతున్నాడు. అక్టోబరు 11న ఈ సినిమా విడుదల కాబోతోంది.

సుధీర్ బాబు ఫాదర్ సెంటిమెంట్

మా నాన్న సూపర్‌ హీరో (Ma Nanna Hero) చిత్రంతో రానున్నాడు సుధీర్ బాబు. అభిలాష్‌ రెడ్డి కంకర తెరకెక్కిస్తున్న ఈ సినిమా అక్టోబర్ 11న విడుదల కానుంది. తండ్రీకొడుకుల అనుబంధం కథతో ఈ సినిమా తెరకెక్కింది. గత కొంతకాలంగా ఫ్లాప్​లతో సతమతమవుతున్న సుధీర్ బాబు (Sudheer Babu)కు ఈ ఫాదర్ సెంటిమెంట్ వర్కవుట్ అవుతుందా లేదా అనేది చూడాలి.

జనక అయితే గనక

అంబాజీ పేట బ్యాండ్‌, ప్రసన్న వదనం సినిమాతో ప్రేక్షకులను అలరించిన నటుడు సుహాస్‌(Suhas). దసరా బరిలో ఈ యంగ్ నటుడు కూడా ఉన్నాడు. జనక అయితే గనక ( Janaka Aithe Ganaka) సినిమాతో ఈ దసరాకు బాక్సాఫీస్ వద్ద తన హవా చూపించనున్నాడు. దిల్‌రాజు ప్రొడక్షన్స్‌ నుంచి వస్తున్న ఈ సినిమాను సందీప్‌ రెడ్డి బండ్ల తెరకెక్కించారు. అక్టోబరు 12న ఈ సినిమా రిలీజ్ కానుంది.

దసరా బరిలో తలైవా

దసరా బరిలో తెలుగు స్టార్ హీరోలు ఎవరు లేకున్నా, తమిళ సూపర్​ స్టార్​ హీరో రజనీకాంత్ (Rajinikanth)​ బరిలోకి దిగుతున్నారు. వేట్టయాన్‌ (Vettaiyan) చిత్రంతో బాక్సాఫీస్‌ వద్ద టఫ్ ఫైట్ ఇచ్చేందుకు వస్తున్నారు. జై భీమ్‌ ఫేం టి.జె.జ్ఞానవేల్‌ ఈ సినిమాను తెరకెక్కించారు. ఈ మూవీలో అమితాబ్‌ బచ్చన్, రానా, ఫహాద్‌ ఫాజిల్‌ కీలక పాత్రల్లో కనిపించనున్నారు. అక్టోబరు 10న ఈ సినిమా రానుంది.