మందుబాబులకు కిక్కిచ్చే న్యూస్.. తెలంగాణ సర్కార్ కీలక నిర్ణయం

హాట్ హాట్ సమ్మర్‌లో కూల్ కూల్ గా బీర్ తాగాలనుకుంటున్నారా.. ఇలా తాగే మందుబాబులకు తెలంగాణ ప్రభుత్వం (Telangana Govt) కిక్కిచ్చే న్యూస్ చెప్పింది. మద్యం ప్రియుల కోసం రాష్ట్రంలో కొత్తగా 70 బార్లు ఏర్పాటు చేయాలని నిర్ణయించింది. అందుకోసం ఆదాయం ఎక్కువగా వచ్చే ప్రాంతాలను వెతుకుతోంది. ఇప్పటికే రాష్ట్రంలో 1,171 బార్లు ఉన్న విషయం తెలిసిందే. సగానికిపైగా జంట నగరాలైన హైదరాబాద్, సికింద్రాబాద్ లలో ఉన్నాయి.

70 కొత్త బార్లు

ఈ క్రమంలో రాష్ట్రవ్యాప్తంగా పలు ప్రధాన పట్టణాలు, నగరాలల్లో బార్లు ఏర్పాటు చేసేందుకు ప్రభుత్వం రంగం సిద్ధం చేసింది. అయితే ఆదాయం పెంచుకునేందుకు ఎక్సైజ్ శాఖ (Telangana Excise Department) ఈ ప్రతిపాదన తీసుకొచ్చినట్లు సమాచారం. అలాగే మైక్రోబూవరీల (micro brewery) సంఖ్యను కూడా పెంచాలని యోచిస్తున్న తెలిసింది. ఈ నేపథ్యంలో రాష్ట్రంలో కొత్తగా మద్యం బ్రాండ్లు కూడా అందుబాటులోకి రానున్నాయట.

53 రకాల బ్రాండ్లు

తెలంగాణలో బీర్లు, లిక్కర్‌ అమ్మేందుకు పలు కంపెనీల నుంచి రాష్ట్ర బేవరేజెస్‌ కార్పొరేషన్‌ లిమిటెడ్‌(TGBCL) దరఖాస్తులు ఆహ్వానించినట్లు ప్రభుత్వ వర్గాలు తెలిపాయి. 40 వరకు కంపెనీలు లిక్కర్ సరఫరా చేసేందుకు ముందుకొచ్చినట్లు వెల్లడించాయి. అందులో 20 వరకు విదేశీ లిక్కర్‌ బ్రాండ్లు.. 10 బీర్ల కంపెనీలు ఉన్నట్లు ఎక్సైజ్ శాఖ పేర్కొంది. ప్రస్తుతం రాష్ట్రంలో 53 రకాల దేశీయ, విదేశీ బీరు, మద్యం బ్రాండ్లు సరఫరా అవుతున్న విషయం తెలిసిందే.