admin
తెలంగాణ రాష్ట్ర సర్కార్ (Telangana Govt) జనవరి 26వ తేదీన నాలుగు పథకాలు ప్రారంభించిన విషయం తెలిసిందే. ఇందులో భాగంగానే భూమి లేని రైతు కూలీల ఖాతాల్లో ఇందిరమ్మ ఆత్మీయ భరోసా (indiramma atmiya bharosa) నగదును బదిలీ చేసింది. సోమవారం నుంచి వీటిని డ్రా చేసుకునే వెసులుబాటు కల్పించింది. అయితే ఈ పథకం కేవలం గ్రామాల్లో రైతులకే వర్తిస్తోందని.. మున్సిపాలిటీల్లో ఉంటున్న రైతు కూలీలకు వర్తించడం లేదు.
8 లక్షల మందికి రావడం లేదు
ఈ క్రమంలో ఇందిరమ్మ ఆత్మీయ భరోసా పథకంపై తెలంగాణ హైకోర్టులో ప్రజా ప్రయోజన వాజ్యం దాఖలైంది. పురపాలికల్లో ఉన్న రైతు కూలీలకు ఈ పథకం డబ్బులు ఇవ్వడం లేదని నారాయణపేట వాసి గవినోళ్ల శ్రీనివాస్ హైకోర్టులో పిటిషన్ వేశారు. ఈ స్కీమ్ ద్వారా రాష్ట్ర ప్రభుత్వం భూమి లేని రైతు కూలీలకు ఏటా రూ.12 వేలు చెల్లించాలని నిర్ణయించింది. అయితే 129 పురపాలికల్లో 8 లక్షల మందికి పైగా ఉన్న రైతు కూలీలకు ఈ పథకం వర్తించేలా చేయాలని కోర్టును కోరారు.
ఆ కూలీలకు కూడా ఇవ్వండి
ఈ నేపథ్యంలో పిటిషన్ తరఫున న్యాయవాది మాట్లాడుతూ రైతు కూలీలు ఎక్కడ ఉన్నా అందరూ సమానమేనని, గ్రామాల్లో వారికే వర్తింపజేయడం సుప్రీంకోర్టు తీర్పులకు విరుద్ధం అని పేర్కొన్నారు. దీనిపై హైకోర్టు స్పందిస్తూ, నాలుగు వారాల్లో పురపాలికల్లో రైతు కూలీలను కూడా ఇందిరమ్మ ఆత్మీయ భరోసా పథకం కిందకు తీసుకుని లబ్ధి చేకూర్చాలని సీఎస్కు ఆదేశాలు జారీ చేసింది.
Desk
swarna boddula
