రాఖీ శుభ ముహూర్తం.. ఏ సమయంలో రాఖీ కట్టాలో తెలుసా?

ManaEnadu:సోదర సోదరీమణుల మధ్య ప్రేమ, ఆప్యాయతకు గుర్తుగా రక్షా బంధన్ జరుపుకుంటారు. ఈ పవిత్రమైన రోజున సోదరీమణులు తమ సోదరుల చేతికి రాఖీ కడతారు. అన్నదమమ్ములు తమ అక్క చెల్లెల్లకు రక్షణగా నిలుస్తామని భరోసా కల్పిస్తూ వారికి బహుమతులు ఇస్తారు. ఆగస్టు 19వ తేదీన దేశవ్యాప్తంగా రాఖీ పండుగ జరుపుకోనున్నారు. ఈ నేపథ్యంలో  ఏ సమయంలో రాఖీ కట్టకూడదు? ఏ సమయంలో కడితే మంచి ఫలితాలు లభిస్తాయో తెలుసుకుందాం.

శ్రావణ పౌర్ణమి రోజున రక్షా బంధన్ జరుపుకుంటారు.  ఈ ఏడాది ఆగస్టు 19, 2024 సోమవారం నాడు రాఖీ పౌర్ణమి వచ్చింది. అయితే శాస్త్రాల ప్రకారం, భద్రకాలంలో సోదరీమణులు తమ సోదరుల చేతికి రాఖీ కట్టకూడదని ప్రముఖ జ్యోతిష్య నిపుణులు మాచిరాజు కిరణ్​ కుమార్​ చెబుతున్నారు. భద్ర కాలం సమయం  సోమవారం సూర్యోదయం  5:53 గంటలకు ప్రారంభమై.. మధ్యాహ్నం 1:32 గంటల వరకు ఉంటుంది. ఈ సమయం పూర్తయ్యాకే రాఖీ పండగను జరుపుకోవాలని జ్యోతిష్యులు సూచిస్తున్నారు.

సోమవారం మధ్యాహ్నం 1:33 గంటల నుంచి రాత్రి 9:08 గంటల వరకు శుభ సమయం ఉందని.. ఈ సమయంలో రాఖీ కట్టొచ్చని చెబుతున్నారు. మధ్యాహ్నం 1:43 గంటల నుంచి సాయంత్రం 4:20గంటల వరకు, సాయంత్రం 6:56 గంటల నుంచి రాత్రి 9:08 గంటల మధ్య సమయంలో రాఖీ కడితే  సంవత్సరం అంతా విష్ణుమూర్తి అనుగ్రహం లభిస్తుందని మాచిరాజు కిరణ్​ కుమార్​ తెలిపారు.