ట్యాక్స్ టెర్రర్.. ట్రంప్ దెబ్బకు ఆసియా మార్కెట్లు కుదేల్

అమెరికా అధ్యక్షుడు డొనాల్డ్‌ ట్రంప్‌ (Donald Trump) అన్నంత పని చేశారు. సుంకాలతో ప్రపంచ దేశాలను పెద్ద దెబ్బ కొట్టారు. భారత్‌ సహా ప్రపంచవ్యాప్తంగా అన్ని దేశాలపై సుంకాలతో భారీ షాక్ ఇచ్చారు. అన్ని దేశాల వారూ తమ ఉత్పత్తులను అమెరికా మార్కెట్లో విక్రయించుకోవచ్చని గుడ్ న్యూస్ చెప్పిన ట్రంప్.. అంతలోనే వాటికి కనీసం 10% సుంకం చెల్లించాలని బాంబ్ వేశారు. ఇక  ట్రంప్‌ ట్యాక్స్ టెర్రర్ తో  స్టాక్‌ మార్కెట్లు కుదేలయ్యాయి.

భారత్ పై టారిఫ్  ప్రభావం 

ట్రంప్‌ టారిఫ్‌ల (Trump Tariffs)తో ఆసియా మార్కెట్లు పతనమయ్యాయి. జపాన్ పై 24 శాతం సుంకాలు విధించడంతో  గురువారం ఉదయం ఆ దేశ నిక్కీ ఏకంగా 3.4 శాతానికి పైగా కుంగింది.  దక్షిణ కొరియా (South Korea) కోస్పీ 1.9శాతం, ఆస్ట్రేలియా ఏఎస్‌ఎక్స్‌ సూచీ 1.8శాతం నష్టాల్లో కొనసాగుతున్నాయి. ఇక భారత మార్కెట్లు కూడా గురువారం నష్టాలతో ప్రారంభమయ్యాయి.  అయితే ట్రంప్‌ ప్రకటనకు ముందు అమెరికా మార్కెట్లు స్వల్ప లాభాల్లో సాగాయి.

అమెరికా ఫ్యూచర్ మార్కెట్లు కుదేల్

టారిఫ్‌లపై ట్రంప్ నిర్ణయం వెల్లడించగా.. అమెరికా ఫ్యూచర్‌ మార్కెట్లు (American Markets) పతనమయ్యాయి. S&P 500 ఫ్యూచర్స్‌ సూచీ 3 శాతం మేర పడిపోవడంతో స్థానిక కాలమానం ప్రకారం గురువారం నాటి ట్రేడింగ్‌లో అక్కడి మార్కెట్లు భారీ నష్టాలను మూటగట్టుకుంటాయని నిపుణులు భావిస్తున్నారు. ఇక ట్రంప్ టారిఫ్‌ల నేపథ్యంలో గత కొన్ని రోజులుగా ప్రపంచ మార్కెట్లు కుదేలైన విషయం తెలిసిందే. దీంతో బంగారాన్ని పెట్టుబడి సాధనంగా మదుపర్లు భావించడంతో పసిడి ధరలు (Gold Prices) ఆకాశాన్నంటాయి. ఇక తాజాగా గోల్డ్ రేట్లు మరింత పెరిగి రికార్డు క్రియేట్ చేశాయి. అమెరికా మార్కెట్‌లో స్పాట్‌ గోల్డ్‌ ఔన్సు ధర 0.4 శాతం పెరిగి 3,145.93 డాలర్ల వద్ద కొనసాగుతోంది.