adminManaEnadu:ఇండియన్ మీడియాలోనే అతిపెద్ద విలీనం రిలయన్స్ – డిస్నీ డీల్. ఈ విలీనం విషయంలో తాజాగా మరో కీలక అడుగు ముందుకు పడింది. రిలయన్స్ ఇండస్ట్రీస్‌కు చెందిన వయాకామ్, వాల్ట్‌ డిస్నీ కంపెనీకి చెందిన స్టార్ ఇండియాల మధ్య 8.5 బి. డాలర్ల (సుమారు రూ. 70,550 కోట్ల) ఈ ఏడాది విలీన ఒప్పందం (Reliance-Disney India merger) జరిగింది. ఈ వ్యాపార విలీనానికి కాంపిటీషన్‌ కమిషన్‌ ఆఫ్ ఇండియా (CCI) తాజాగా ఆమోదం తెలిపింది.
విలీనానికి సంబంధించి ఆరు నెలల క్రితమే ఇరు సంస్థలు ప్రకటన చేసిన విషయం తెలిసిందే. చిన్నపాటి మార్పులతో డీల్‌కు ఆమోదం తెలిపినట్లు సీసీఐ ఎక్స్‌లో పోస్ట్‌ చేసింది. రిలయన్స్ ఇండస్ట్రీస్‌ లిమిటెడ్‌, వయాకామ్ (Viacom Media) మీడియా ప్రైవేట్‌ లిమిటెడ్‌, డిజిటల్‌ 18 మీడియా లిమిటెడ్‌, స్టార్ ఇండియా (Star India) ప్రైవేట్‌ లిమిటెడ్‌, స్టార్ టెలివిజన్‌ ప్రొడక్షన్స్‌ లిమిటెడ్‌ వంటి సంస్థలకు సంబంధిత ప్రతిపాదిత విలీన ప్రక్రియ స్వచ్ఛంద సవరణకు లోబడి ఆమోదం పొందిందని సీసీఐ పేర్కొంది. ఆ సవరణలు ఏంటనేవి మాత్రం వెల్లడించక పోవడం గమనార్హం.
ఈ విలీనం వల్ల పోటీ పరంగా ఇబ్బందులు తలెత్తొచ్చని సీసీఐ ఆందోళన వ్యక్తం చేసినట్లు గతంలో వార్తలు వచ్చాయి. అయితే తాజాగా ఈ రెండు కంపెనీల మెర్జింగ్ కు గ్రీన్ సిగ్నల్ లభించడం గమనార్హం. ఇక ఈ రెండు సంస్థల మధ్య విలీనం తర్వాత.. 120 టెలివిజన్‌ ఛానెళ్లు, రెండు స్ట్రీమింగ్ ప్లాట్‌ఫామ్‌లతో కూడిన అతిపెద్ద మీడియా సంస్థగా అవతరించనుంది.
ఇక విలీన సంస్థలో రిలయన్స్ (Reliance)కు 63.16 శాతం వాటాలు రానున్నాయి. మరోవైపు వాల్ట్‌ డిస్నీ (Walt Disney Company)కి 36.84 శాతం దక్కనుంది. ఈ మీడియా వెంచర్‌కు ముకేశ్‌ అంబానీ సతీమణి నీతా అంబానీ ఛైర్‌ పర్సన్‌గా వ్యవహరించనున్నారు. మరోవైపు వాల్ట్‌ డిస్నీ మాజీ ఎగ్జిక్యూటివ్‌ ఉదయ్‌ శంకర్‌ వైస్ ఛైర్మన్‌గా బాధ్యతలు చూసుకుంటారు. ఇది దేశంలోనే మీడియా రంగంలో అతి పెద్ద విలీనంగా అవతరించబోతోంది.
Desk
swarna boddula
