adminManaEnadu:పశ్చిమ బెంగాల్లోని కోల్కతా ఆర్జీ కార్ ఆస్పత్రిలో జూనియర్ డాక్టర్ హత్యాచార ఘటనపై దేశవ్యాప్తంగా నిరసనలు వెల్లువెత్తుతున్న విషయం తెలిసిందే. ఈ ఘటనను నిరసిస్తూ.. నిందితుడిని కఠినంగా శిక్షించాలని డిమాండ్ చేస్తూ కొద్ది రోజులుగా వైద్యులు కూడా విధులు బహిష్కరించిన ఆందోళనలు చేపడుతున్నారు. ముఖ్యంగా దిల్లీ ఎయిమ్స్, ఆర్ఎంఎల్, ఇతర ప్రభుత్వ ఆసుపత్రుల రెసిడెంట్ డాక్టర్లు పెద్ద ఎత్తున నిరసన వ్యక్తం చేస్తున్నారు. ఈ నేపథ్యంలో సుప్రీంకోర్టు ఈ ఆందోళనలపై స్పందిస్తూ వైద్యులు పనిచేయకపోతే ప్రజారోగ్య వ్యవస్థ ఎలా పనిచేస్తుందని ప్రశ్నిస్తూ.. మొదట ఆందోళన చేస్తున్న డాక్టర్లను విధుల్లో చేరమని సూచించింది.
ఈ నేపథ్యంలో సుప్రీంకోర్టు ఆదేశాలతో వైద్యులు ఆందోళనలు విరమించారు. విధుల్లోకి చేరాలని కోరడం, అధికారులు ఎలాంటి చర్యలు తీసుకోకుండా చూస్తామని సుప్రీంకోర్టు హామీలు ఇచ్చిన క్రమంలో సమ్మెను విరమిస్తున్నట్లు వైద్యులు ప్రకటించారు. ఆగస్టు 23వ తేదీ ఉదయం 8 గంటల నుంచి సేవలను పునఃప్రారంభిస్తున్నట్లు వెల్లడించారు. ఈ సందర్భంగా రిసిడెంట్ డాక్టర్ అసోసియేషన్, డా.ఆర్ఎంఎల్ హాస్పిటల్.. తమ విధులన్నింటినీ తిరిగి ప్రారంభించాలని నిర్ణయించుకున్నట్లు ఓ ప్రకటన విడుదల చేసింది.
మరోవైపు RDA ఎయిమ్స్ దిల్లీ జనరల్ సెక్రటరీ డాక్టర్ రఘునందన్ దీక్షిత్ మాట్లాడుతూ.. తమ డిమాండ్లతోపాటు ఆందోళనలను సుప్రీంకోర్టు పరిగణనలోకి తీసుకున్న నేపథ్యంలో సమ్మె విరమిస్తున్నట్లు తెలిపారు. 11 రోజులుగా సమ్మె నిర్వహించామని, కోర్టులు జోక్యం చేసుకోవడం ఉపశమనం కలిగించిందని అన్నారు. కేసును CBIకి బదిలీ చేయాలన్న తమ డిమాండ్ను మొదట కలకత్తా హైకోర్టు పరిష్కరించిందని, హత్యాచార ఘటనను సుప్రీం కోర్టు సుమోటోగా తీసుకుని సమగ్రంగా విచారణ జరిపిందని.. అందుకే AIIMS జనరల్ బాడీ సమ్మె విరమించాలని నిర్ణయించిందని ఆయన తెలిపారు. కానీ న్యాయం కోసం తమ పోరాటం కొనసాగుతూనే ఉంటుందని వెల్లడించారు.
Desk
swarna boddula
