Women’s Day Special : మహిళలపై తెలంగాణ సర్కార్ వరాల జల్లు

అంతర్జాతీయ మహిళా దినోత్సవం (International Women’s Day) సందర్భంగా మహిళలను గౌరవిస్తూ ఘనంగా వేడుకలు నిర్వహించాలని రాష్ట్ర ప్రభుత్వం నిర్ణయించింది. ఇందులో భాగంగా అందుకు సంబంధించి సికింద్రాబాద్ పరేడ్ గ్రౌండ్లో భారీ ఏర్పాట్లు చేసింది. ఇవాళ సాయంత్రం భారీ బహిరంగ సభ నిర్వహించి ఆ సభా వేదికగా.. ఇందిరా మహిళా శక్తి మిషన్ 2025 (Indira Mahila Shakti Mission)ను ప్రభుత్వం విడుదల చేయనుంది.

ఇందిరా మహిళా శక్తి మిషన్

ఈ పాలసీ ద్వారా రాష్ట్ర సర్కార్.. కోటి మంది మహిళలను కోటీశ్వరులను చేయాలని సంకల్పించింది. మహిళల ఆర్థిక స్వేచ్ఛ, ఉపాధి కల్పన, సంపద సృష్టి ప్రధాన లక్ష్యాలుగా ఈ పాలసీ రూపొందించింది. ఇందులో సభ్యుల కనీస వయసును 18 నుంచి 15కు, గరిష్ట వయసును 60 ఏళ్ల నుంచి 65కు పెంచుతూ సర్కార్ నిర్ణయం తీసుకుంది. మరోవైపు 32 జిల్లాల్లో మ‌హిళా సంఘాలు ఏర్పాటు చేయనున్న 64 మెగావాట్ల సౌర విద్యుత్ ప్లాట్ల నిర్మాణానికి ముఖ్యమంత్రి వర్చువల్‌గా శ్రీకారం చుట్టనున్నారు.

అద్దె బస్సులకు శ్రీకారం

మరోవైపు ఆర్టీసీలో మహిళా సంఘాల అద్దె బస్సులను కూడా ముఖ్యమంత్రి రేవంత్ రెడ్డి ఇవాళ ప్రారంభిస్తారు. మొద‌టి విడ‌త‌లో 50 బస్సులకు పచ్చ జెండా ఊపుతారు. తొలి విడతలో 150 మండలాల మహిళా సమాఖ్యలకు, ఆ తర్వాత మరో 450 సంఘాలకు అద్దె బస్సులు కేటాయించనున్నారు. ఈ క్రమంలో మహిళా సంఘాలకు ఆర్టీసీ నెలకు రూ.77,220 అద్దె చెల్లించనుంది. మరోవైపు పూర్తిగా మహిళలే నిర్వహించేలా 31 జిల్లాల్లో పెట్రోల్ బంకులకు శ్రీకారం చుట్టేందుకు ఇవాళ చమురు సంస్థలతో ఒప్పందాలు జరగనున్నారు.