adminMana Enadu: చాలా మంది ఏ చిన్న ఆరోగ్య సమస్య(Health Issue) వచ్చినా వెంటనే మెడికల్ షాపుకెళ్లి తలనొప్పి, జ్వరం, దగ్గు, జలుబు అని చెప్పి సొంత వైద్యం చేసుకుంటారు. మారిన వాతావరణ పరిస్థితులు, దోమల బెడద కారణంగా చాలా మంది జ్వరం, ఒంటి నొప్పులు, జలుబు ఇతర సమస్యలతో బాధపడుతున్నారు. దీంతో చాలా మంది డాక్టరు దగ్గరికి వెళ్తే ఎక్కువ డబ్బులు అవుతాయని మెడికల్ షాపు నుంచి ఏ పారాసిటమాలో(Paracetamol), డోలో(Dolo) ట్యాబ్లెట్లో తెచ్చుకొని వాడుతుంటారు. ఒకవేళ తగ్గకపోతే రోజుకు 3 నుంచి 4 ట్యాబ్లెట్స్ తీసుకుంటున్నారు. అయితే సాధారణంగా డోలో వేసుకుంటే జ్వరం, ఒళ్లు నొప్పుల నుంచి ఉపశమనం లభిస్తుంది.
అయితే వీటిని మరీ ఎక్కువగా వైద్యుల సూచనలు లేకుండా వాడటం మంచిది కాదని వైద్య నిపుణులు హెచ్చరిస్తున్నారు. జ్వరాల లక్షణాలు అన్నీ ఒకే రకంగా ఉండవనీ, ఎక్కువ రోజుల పాటు జ్వరం ఉంటే డోలో వాడటం మాని తక్షణం డాక్టరు సూచనతో వైద్య పరీక్షలు చేయించుకొని ట్యాబ్లెట్స్ వాడాలని చెబుతున్నారు. టైపాయిడ్, మలేరియా, డెంగీ, చికెన్ గున్యా వంటి జ్వరాల తీవ్ర ఇప్పుడు ఎక్కువగా ఉంది. వీటి చికిత్సా విధానం వేరుగా ఉంటుందని.. డోలో ట్యాబ్లెట్ వేసుకొని కాస్త తగ్గుతుంది కదా అని నిర్లక్ష్యం చేస్తే.. తర్వాత తీవ్ర పరిణామాలు ఎదురయ్యే అవకాశం ఉందని అభిప్రాయపడుతున్నారు.
ఈ దుష్ప్రభావాలు కనిపిస్తాయి
డోలో ట్యాబ్లెట్స్(Tablets) వల్ల జ్వరంతో పాటు వెన్నునొప్పి, నరాల నొప్పి, కండరాల నొప్పి నుంచి కాస్త ఉపశమనం లభించడం నిజమే అయినప్పటికీ.. దీన్ని పరిమితికి మించి వాడితే దుష్ప్రభావాలు తప్పవని వైద్య నిపుణులు హెచ్చరిస్తున్నారు. మెడిసిన్ తీసుకునే స్థాయి పెంచడం, తరచూ వినియోగించడం వల్ల సైడ్‌ఎఫెక్ట్స్ ఉంటాయని వైద్యులు చెబుతున్నారు.
☛ సాధారణంగా డోలో ఎక్కువగా తీసుకుంటే వికారం, బలహీనంగా అనిపించడం, అధిక నిద్ర, మలబద్ధకం, నోట్ల తడి ఆరిపోవడం, ఒక్కోసారి కళ్లు తిరగడం వంటివి కనిపిస్తాయి.
☛ వీటి వినియోగం మరీ ఎక్కువగా ఉంటే గుండె కొట్టుకునే వేగం తగ్గడం, ఊపిరితిత్తుల పనితీరులో మార్పు, శ్వాస తీసుకోవడంలో ఇబ్బందులు, నాడీ వ్యవస్థ, కాలేయ సంబంధిత సమస్యలు, గుండె దడ వంటి లక్షణాలు కనిపిస్తాయని నిపుణులు హెచ్చరిస్తున్నారు.
☛ అందుకే డోలో-650 ట్యాబ్లెట్ వినియోగం విషయంలో తప్పనిసరిగా వైద్యులు, వైద్య నిపుణుల సలహా తీసుకోవడం ఉత్తమం. లేదంటే పరిమితికి మించి వాడి మరిన్ని ఆరోగ్య సమస్యల బారినపడే ముప్పు ఉంటుంది.
swarna boddula
Desk
